31 აგვისტოს CENN-ის ბულაჩაურის მწვანე ცენტრში გაიმართება ახალგაზრდული ბანაკის საზეიმო დახურვა, რომელსაც UNICEF-ის, საქართველოს განათლებისა და მეცნიერების სამინისტროს, შსს საგანგებო სიტუაციების მართვის დეპარტამენტისა და საქართველოს გარემოს დაცვის სამინისტროს წარმომადგენლები დაესწრებიან.
CENN-ის მწვანე ცენტრი, რომელიც მცხეთა-მთიანეთის რაიონში სოფელ ბულაჩაურში მდებარეობს, 10 დღის განმავლობაში საქართველოს რეგიონების 8 სკოლის მოსწავლეებს მასპინძლობდა. ათდღიანი საგანმანათლებლო ბანაკის პერიოდში სკოლის მოსწავლეები აქტიურ მონაწილეობას იღებდნენ სხვადასხვა გარემოსდაცვით აქტივობაში - ინტერაქტიურ სემინარებსა და საველე გასვლებში.
საგანმანათლებლო ბანაკი "უსაფრთხო სკოლა- უსაფრთხო მომავლისთვის" განხორციელდა მაღალი რისკის ზონაში მდებარე 8 საპილოტე სკოლაში CENN-ის მიერ ევროკავშირისა და UNICEF-ის მხარდაჭერით მიმდინარე პროექტის ფარგლებში - საქართველოს 8 საპილოტე სკოლაში კატასტროფების რისკებისთვის მზაობისა და მათი შერბილების აქტივობების და კატასტროფების რისკების შემცირების ცნობიერების ამაღლების კამპანიის განხორციელება.
პროექტის ძირითად მიზანს სკოლებში ბუნებრივი კატასტროფების პრევენციის მიზნით საგანგებო სიტუაციების მართვის გეგმებისა და უსაფრთხოების წესების შემუშავება და დანერგვა, სკოლის მასწავლებლებისა და მოსწავლეების ტრენინგი და საგანგებო სიტუაციების მართვისათვის საჭირო სპეციალური აღჭურვილობის შეძენა და სკოლებისათვის მიწოდება წარმოადგენდა.
პროექტი მიმდინარეობდა ნიკორწმინდის, ლასურიაშის, მესტიის, დანისპარაულის, აწყურის, ბრეთის, მლეთისა და თბილისის 47-ე საჯარო სკოლებში.
პროექტის ფარგლებში მოხდა სკოლების რისკების შეფასება, სკოლების საგანგებო სიტუაციების მართვის გეგმების შემუშავება საქართველოს კანონმდებლობაზე დაყრდნობით და მასწავლებლებისა და მოსწავლეებისათვის სიმულაციური ტრენინგების ჩატარება. სკოლების რისკების შეფასებიდან გამომდინარე, ჩატარდა სკოლების ინფრასტრუქტურის გაუმჯობესების სამუშაოები და მათი სპეციალური აღჭურვილობით უზრუნველყოფა.
CENN მომავალშიც გეგმავს, აქტიურად იმუშაოს სკოლებთან რისკების შემცირების საკითხებზე, რადგან ამ მიმართულებით მუშაობა ორგანიზაციის სტრატეგიის მნიშვნელოვან ნაწილს წარმოადგენს.
