სომხურ ეკლესიაში ორი უცნობი ახალგაზრდის შეჭრის ინციდენტთან დაკავშირებით საქართველოს საპატრიარქო განცხადებას ავრცელებს.
"რამდენიმე დღის წინ ორი უცნობი ახალგაზრდა შეიჭრა სომხურ ეკლესიაში. მათ ჩაიდინეს ვანდალური აქტი - დააზიანეს სომხური სახარება და შეურაცხყოფა მიაყენეს ეპარქიის წინამძღვრის ტახტს და ტაძარს. მიგვაჩნია, რომ ეს არის მიუღებელი ქმედება, უფრო სწორედ პროვოკაცია, რომლის მიზანია გაამწვავოს ურთიერთობა როგორც ქართულ და სომხურ ეკლესიებს შორის, ისე მოსახლეობაში. ამიტომაც ვთხოვთ სამართალდამცავ ორგანოებს, მოახდინონ სათანადო რეაგირება და რაც შეიძლება დროულად გამოიძიონ აღნიშნული დანაშაული", - აღნიშნულია განცხადებაში.
შეგახსენებთ, რომ ინციდენტი სომხურ ეკლესიაში რამდენიმე დღის წინ მოხდა.
