დიდუბის პანთეონში რამაზ ჩხიკვაძის მეუღლე ნატაშა კობახიძე დაკრძალეს. თავად მსახიობი მეუღლის დაკრძალვას ვერ დაესწრო.
"რამაზი შეუძლოდ არის. ეს წუთები მისთვის ყველაზე მტკივნეულია. მე და რამაზმა ნატაშა ერთად გავიცანით. ისინი 50 წელზე მეტია ერთად იყვნენ. ოჯახებით ახლო ურთიერთობა გვაკავშირებდა. ძალიან ვწუხვარ, მიჭირს მასზე წარსულში საუბარი", - განუცხადა "ჯი-ეიჩ-ენს" მსახიობმა გურამ საღარაძემ.
"ყველა მათ სიყვარულზე საუბრობს. ქალბატონი ნატაშა ძალიან კარგი მეუღლე იყო. რამაზის და მისი ურთიერთობის შესახებ ძალიან ბევრი რამის თქმა შეიძლება. რა თქმა უნდა, გული დაგვწყდა ყველას, მაგრამ რამაზს უფრო რთული პერიოდი აქვს. მის ჯანმრთელობას თუ გავითვალისწინებთ, უფალს ვთხოვთ მის გაძლიერებას", - განუცხადა "ჯი-ეიჩ-ენს" მსახიობმა მარინა კახიანმა.
"წლები მაკავშირდებდა, პროდუსერი იყო ჩვენი სპექტაკლისა "სიკვდილის როკვა", რითაც გაიხსნა თეატრი, ამ სპექტაკლით ჩვენ დიდი ტურნე მოვაწყვეთ იტალიაში, ჩეხეთში და სხვადასხვა ქალაქში. ეს იყო ქალბატონი, რომელმაც დიდი წვლილი შეიტანა თეატრალურ ისტორიაში", - აღნიშნა "ჯი-ეიჩ-ენთან" საუბარში თავისუფალი თეატრის ხელმძღვანელმა ავთანდილ ვარსიმაშვილმა.
"ნატაშა 1959 წელს გავიცანი, მაშინ, როდესაც ფილმის "ყვავილი თოვლზე" გადაღება მიმდინარეობდა. მას შემდეგ ვმეგობრობდით. ძალიან კარგი ადამიანი და შესანიშნავი მეუღლე იყო", - განაცხადა "ჯი-ეიჩ-ენთან" საუბარში კომპოზიტორმა ვაჟა აზარაშვილმა.
შეგახსენებთ, რომ ნატაშა ჩხიკვაძე გულის შეტევით ჩეხეთში გარდაიცვალა.
