ნაცარგორას (ხაშურის რაიონი) ადრინდელი ბრინჯაოს ხანის ნამოსახლარში არქეოლოგიური გათრები განახლდება. გაგრძელდება ნიადაგის ზედაპირის შესწავლა და გასულ წლებში დაწყებული არქეომეტრიული ანალიზისთვის საჭირო ნიმუშების შეგროვება. როგორც "ჯი-ეიჩ-ენს" იტალიის საელჩოდან აცნობეს, გათხრებში მონაწილეობას 10 იტალიელი და 10 ქართველი მეცნიერი და სტუდენტი მიიღებს. აღსანიშნავია, რომ 1984-1987 წლებში, ნაცარგორას ნამოსახლარი ქართველმა არქეოლოგმა ა.რამიშვილმა გამოიკვლია.
2011 წლის დეკემბერში იგეგმება სამეცნიერო ნაშრომის I ტომის გამოცემა, რომელშიც თავმოყრილი იქნება აღნიშნული არქეოლოგიური მისიის მიერ ჩატარებული სამუშაოების შედეგები: მ.ფეთურიძე, ე.როვა "ხაშური, ნაცარგორა: ადრინდელი ბრინჯაოს ხანის ნამარხები" (შიდა ქართლის ქართულ-იტალიური არქეოლოგიური პროექტი I, Khashuri Natsargora: The EBA Graves, Brepols Publisher, Turnhout 2011).
ვენეციის კა' ფოსკარის უნივერსიტეტის არქეოლოგიური მისია, რომელიც 2009 წელს დაიწყო, გაგრძელდება ა/წ 5 ოქტომბრამდე. აღნიშნული არქეოლოგიური მისიის მუშაობა ხორციელდება პროექტის ფარგლებში, რომელიც მიზნად ისახავს შიდა ქართლში გვიანდელი ენეოლითისა და ადრინდელი ბრინჯაოს ხანის (ჩვ.წ.აღ-მდე IV-III ათასწლეულები) კულტურის შესწავლას. პროექტს, რომელიც ხორციელდება საქართველოს ეროვნულ მუზეუმთან თანამშრომლობით, ხელმძღვანელობენ პროფესორი ელენა როვა, ეროვნული მუზეუმის მეცნიერ-თანამშრომელი ზურაბ მახარაძე და თბილისის სახელმწიფო უნივერსიტეტის პროფესორი მარინა ფუთურიძე.
