"თავისუფალი საქართველო" ხელისუფლებას აფხაზეთსა და ცხინვალის ომში წინა ხაზზე მებრძოლი ერთ-ერთი მოქალაქის, გელა გოგილაშვილის დეზერტირად გამოცხადებასა და მის მკვლელობაში ადანაშაულებს.
როგორც კახა კუკავას პარტიის დედოფლისწყაროს ორგანიზაციის თავმჯდომარე თამილა გურაშვილი აცხადებს, აფხაზეთომგამოვლილი, 37 წლის გელა გოგილაშვილი, რომელიც ცხინვალის ომშიც წინა ხაზზე იბრძოდა, ჯერ დეზერტირად გამოაცხადეს, შემდეგ კი ციხეში საეჭვო ვითარებაში გარდაცვლილი იპოვეს.
„თავისუფალი საქართველოს" დედოფლისწყაროს ორგანიზაცია მოითხოვს, დედოფლისწყაროელ გელა გოგილაშვილს დეზერტირის სტატუსი მოეხსნას და გმირის წოდება მიენიჭოს.
"მოვითხოვთ ეს მოთხოვნა წარადგინოს იმ ადგილობრივმა კომპეტენტურმა ძალოვნებმა და მუნიციპალიტეტის ხელმძღვანელობამ, რომელნიც შესანიშნავად იცნობდნენ ამ პიროვნებას და იციან, რომ ნამდვილად გმირი იყო. მოვითხოვთ შემდგომში სრული პასუხისმგებლობა დაეკისროს არამარტო ომის წამომწყებ ძალოვანებს, არამედ ადგილობრივი ძალოვანი უწყების წარმომადგენლებსაც, რადგან მთლიანობაში მათი უნიათო პოლიტიკის შედეგად დაიღუპა ცხინვალის ომში 228 მშვიდობიანი მოქალაქე, ხოლო 30000 ადამიანი დღემდე დევნილობაში რჩება", - აცხადებს თამილა გურაშვილი.
