დღეს, 20 აგვისტოს, ბათუმში, 17:00 საათზე ბათუმის შ.რუსთაველის სახელმწიფო უნივერსიტეტის მიმდებარე ტერიტორიაზე „ექსკლუზივ გრუპი" პროექტის „3D ტელეპორტაციის" განხორციელებას დაიწყებს. პროექტი საქართველოს სპორტისა დ ახალგაზრდობის სამინისტროს მხარდაჭერით ხორციელდება.
პროექტის ფარგლებში, ახალგაზრდა მხატვრები სხვადასხვა ნახატს სამგანზომილებაში დახატავენ. 18:00 საათზე მოზარდების მონაწილეობით გაიმართება „მხიარულთა სტარტები", 20:00 საათზე კი საზოგადოების წინაშე სანახაობრივი ნომრებით წარსდგება ბარმენთა ჯგუფი.
21:45 სთ., დაიწყება მუსიკალური კონცერტი, რომელშიც მონაწილეობას ჯგუფი „დრო21" და ჯგუფი „რეზო & ბავშვები" მიიღებენ. ჯგუფები გამოვლენ მხატვრების მიერ სამგანზომილებაში დახატულ სცენაზე.
როგორც სპორტისა და ახალგაზრდობის საქმეთა სამინისტრო იუწყება, პროექტი „3D ტელეპორტაცია" ემსახურება ახალგაზრდების ნიჭის გამოვლენასა, მათ ხელშეწყობასა და პოპულარიზაციას.
პროექტი დაფინანსებულია სპორტისა და ახალგაზრდობის საქმეთა სამინისტროს სსიპ „ბავშვთა და ახალგაზრდობის განვითარების ფონდის" მიერ.
