ქუთაისში "პოლიტიკური თამაშების" მონაწილეებისა და ორგანიზატორების შეხვედრა გაიმართა. ორგანიზატორებმა მოთამაშეებს პროექტის ფორმატი, თამაშის წესები და დებულება გააცნეს.
ქუთაისის პოლიტიკურ თამაშებში მონაწილეობა მიიღეს "ეროვნული ფორუმის", "თავისუფალი დემოკრატების", "ერთიანი ნაციონალური მოძრაობის", "ეროვნული საბჭოს", "რესპუბლიკური პარტიის", "ახალი მემარჯვენეების", "საქართველოს ახალგაზრდა იურისტთა ასოციაციისა" და "ეროვნულ-დემოკრატიული პარტიის" ახალგაზრდული ორგანიზაციების წარმომადგენლებმა.
შეგახსენებთ, რომ "პოლიტიკური თამაშები" "ახალგაზრდული ფორუმისა" და საერთაშორისო რესპუბლიკური ინსტიტუტის ერთობლივი პროექტია, რომელიც აშშ განვითარების სააგენტოს ფინანსური დახმარებით ხორციელდება.
აღნიშნული პროექტის ორი სეზონი თბილისში, ხოლო ერთი - ბათუმში გაიმართა. ასევე, ჩატარდა "პოლიტიკური თამაშები" სამხრეთკავკასიური ფორმატით, რომელშიც მონაწილეობა ქართველების გარდა, სომეხმა და აზერბაიჯანელმა ახალგაზრდებმაც მიიღეს.
