„უცნობი"(გიორგი გაჩეჩილაძე) რუსთაველის თეატრის ყოფილი სამხატვრო ხელმძღვანელის, რობერტ სტურუას გათავისუფლებას "პარანოიკის" მიერ მიღებულ გადაწყვეტილებად აფასებს.
"ეს იყო "პარანოიკის" გადაწყვეტილება, რომელიც რურუამ აღასრულა. ერთი გიჟის, რომელიც დღესაც ქვეყნის სათავეში ზის", - განაცხადა გაჩეჩილაძემ ჟურნალისტებთან საუბრისას კულტურის სამინისტროსთან გამართულ რობერტ სტურუას მხარდამჭერ აქციაზე.
მისი თქმით, სტურუასთვის ქსენოფობიის შესახებ წაყენებული ბრალდება სისულელეა.
"არ შეიძლება ადამიანზე თქვა ქსენოფობიაო, როდესაც ამბობს, რომ არ მინდა სომეხი პრეზიდენტიო. მე ირლანდიელი პრეზიდენტიც არ მინდა მყავდეს, თუნდაც ფრანგი და იგივე უნდა თქვან?! რაც არ უნდოდა სტურუას, ის თქვა და ეს ქსენოფობია არ არის", - განაცხადა გაჩეჩილაძემ.
შეგახსენებთ, რომ რუსთვალის თეატრის სამხატვრო ხელმძღვანელი რობერტ სტურუა, კულტურისა და ძეგლთა დაცვის მინისტრის ნიკოლოზ რურუას მიერ 9 აგვისტოს ხელმოწერილი ბრძანების თანახმად, თანამდებობიდან გაათავისუფლეს. მინისტრის განცხადებით, ქართველი რეჟისორის განთავისუფლება მის მიერ სომხების მისამართით გაკეთებულ ქსენოფობიურ განცხადებებს უკავშირდება. თავად სტურუას თქმით, მისი ნათქვამის ინტერპრეტაცია არასწორად მოხდა. "მე რასისტი არ ვარ!", - აცხადებს სტურუა.
