საქართველოს საფეხბურთო ნაკრების კაპიტანი, კახი კალაძე რუსთაველის თეატრის სამხატრო ხელმძღვანელის რობერტ სტურუას თანამდებობიდან განთავისუფლებასთან დაკავშირებით განცხადებას ავრცელებს.
"ჯი-ეიჩ-ენის" კახი კალაძის მიერ გავრცელებულ განცხადებას უცვლელად გთავაზობთ:
"გაოცებას ვერ ვმალავ, ადამიანმა, რომელმაც შექმნა მთელი ეპოქა ქართული თეატრისა და კინოს ისტორიაში, ასე ხელის ერთი მოსმით, თითიდან გამოწოვილი მიზეზის გამო განთავისუფლებული იქნა თანამდებობიდან!
ამით ვფიქრობ მაესტროს, რობერტ სტურუას დიდად არაფერი დააკლდება, რადგან ადამიანს თანამდებობა კი არ უნდა ამშვენებდეს არამედ პირიქით.ვწუხვარ, რომ ჩვენს ქვეყანაში ფასეულობათა ძირფესვიანად შეცვლა სურთ გარკვეული თუ გაურკვეველი ძალების მქონე ადამიანთა ლოკალურ ჯგუფებს...
ადამიანი, პროფესიონალი-რომელიც აღიარებული და ავტორიტეტულია მთელს მსოფლიოში, ქართული კულტურის მაღალ ჩინოსნებისთვის მიუღებელი აღმოჩნდა. დამაფიქრებელია, თუმცა ფაქტია, რომ ბატონი რობერტის შემთხვევა არაა პირველი და ალბათ არც უკანასკნელი, როდესაც პროფესიონალების ირგვლივ ხდება შავი PR-ის აგორება, სხვადასხვა მიზეზებით იქმნება მტრის სახე, რომელსაც მავანთაგან მართული მასმედიის საშუალებები აწვდიან მოსახლეობას.
ასეთი მწარე გაკვეთილები გვაახლოვებს გასული საუკუნის ავადსახსენებელ 30-იან წლებს. სამწუხაროა."- ნათქვამია კალაძის განცხადებაში.
