სირიის პრეზიდენტის ბაშარ ალ ასადი გაეროს გენერალურ მდივან პან გი მუნს ტელეფონით ესაუბრა. როგორც BBC გაეროს წარმომადგენელზე დაყრდნობით იუწყება, ბაშარ ალ ასადმა პან გი მუნს განუცხადა, რომ საპროტესტო აქციების საწინააღმდეგოდ ქვეყნის მთვავრობა სამხედრო ძალას აღარ გამოიყენებს. პან გი მუნმა სირიის პრეზიდენტს სამხედრო ოპერაციებისა და მასობრივი დაპატიმრებების შეწყვეტა კატეგორიულად მოსთხოვა. პრეზიდენტი ასადი თავისი ძალადობრივი ქმედებების გამო საერთაშორისო ზეწოლის ქვეშაა.
"გაეროს გენერალური მდივანი შეშფოთებას გამოხატავს სირიაში მიმდინარე მოვლენებთან დაკავშირებით, რადგან ქვეყანაში გრძელდება ადამიანის უფლებების მკაცრად დარღვევა და უშიშროების ძალები საკუთარი მოქალაქეების მიმართ გადამეტებულ ძალას იყენებენ. დაუყოვნებლივ უნდა შეწყდეს ყველა სამხედრო ოპერაცია და მასობრივი დაპატიმრებები ", - განაცხადა გაეროს ოფიციალურმა წარმომადგენელმა.
გაერო სირიის მთავრობას რეფორმების გატარებისკენ მოუწოდებს და ადამიანის უფლებათა დაცვის კუთხით სრულ თანამშრომლობას ჰპირდება. როგორც გაერო იუწყება, ბაშარ ალ ასადმა პირობა დადო, რომ საკონსტიტუციო და საარჩევნო რეფორმა განხორციელდება, ასევე ქვეყანაში შეუფერხებლად შევა გაეროს ჰუმანიტარული დახმარება.
ამასთან, ვრცელდება ინფორმაცია, რომ გუშინდელ შეტაკებებს სირიაში 20 ადამიანი ემსხვერპლა. არსებული ინფორმაციით, მარტში დაწყებული არეულობების შემდეგ 2 000 ადამიანი იქნა მოკლული, ხოლო ათიათასობით დააკავეს. ქვეყნის მთავრობა საპროტესტო აქციების დასაშლელად სამხედრო ძალას მიმართავს. დემონსტრანტების მიმართ ბოლოს განხორციელებულ თავდასხმას საპორტო ქალაქ ლატაკიაში ათობით ადამიანი ემსხვერპლა.
