პროფესიულ უნარების ტესტებში ბარიერი 5000-მა მასწავლებელმა გადალახა, საგნობრივ ტესტებში კი 4000-მა. ამის შესახებ გამოცდების ეროვნული ცენტრის ხელმძღვანელმა მაია მიმინოშვილმა განათლებისა და მეცნიერების სამინისტროში გამართულ ბრიფინგზე განაცხადა. მისი თქმით, საბოლოო შედეგები, თუ რამდენი მასწავლებელი გახდება სერთიფიცირებული, სააპელაციო პროცესის დასრულების შემდეგ გახდება ცნობილი.
"მასწავლებლებს წელს ჰქონდათ შესაძლებლობა მხოლოდ ერთი გამოცდა ჩაებარებინათ და არა ორივე ერთად. დღეს თამამად შეიძლება ვთქვათ, რომ დაახლოებით 5000-მდე პედაგოგი გვყავს, რომლებმაც პროფესიული უნარების ტესტში მოახერხეს ბარიერის გადალახვა და 4000 პედაგოგი გვყავს, რომლებმაც საგნობრივ ტესტებში მოახერხეს ბარიერის გადალახვა. წელს მონაწილეობდა ფაქტიურად ყველა ძირითადი საგნის სპეციალისტი და პედაგოგი განსხვავებით წინა წლისა, როდესაც მონაწილეობას ღებულობდნენ ქართული ენისა და ლიტერატურის, მათემათიკის, უცხო ენის პედაგობები. მათ წელს შეუერთდა დაწყების კლასის მასწავლებლები, ფიზიკის, ქიმიის, ბილოოგიის, ისტორიის, გეოგრაფიისა და სამოქალაქო განათლების მასწავლებლები. ასე რომ, რამდენი სერთიფიცირებული მასწავლებელი გვეყოლება წელს გვეცოდინება სააპელაციო პროცესის დამთავრებისთანავე", - განაცხადა მიმინოშვილმა.
მიმინოშვილის თქმით, დარეგისტრირებული 23 000 პედაგოგიდან დაახლოებით 20000-მდე მიიღო მონაწილეობა გამოცდებში.
სერტიფიცირებული მასწავლებლები ხელფასზე დანამატს - 75 ლარს მიიღებენ. იმ შემთხვევაში, თუ პედაგოგი კომპიუტერისა და ინგლისური ენის გამოცდასაც ჩააბარებს, მისი დანამატი გაიზრდება 200 ლარამდე. ხოლო თუ ორივე გამოცდის ჩაბარების შემთხვევაში სერტიფიცირებული მასწავლებელი საუკეთესო მაჩვენებლების მქონე 25%-ში მოხვდება, მისი ფიქსირებული ხელფასი 1000 ლარი გახდება.
სერტიფიცირებულ მასწავლებლებს ასევე აქვთ შესაძლებლობა იმუშაონ მენტორ მასწავლებლად, ჩაერთონ მასწავლებელთა პროფესიული განვითარების სქემაში და სამინისტროს მიერ ინიცირებულ სხვადასხვა პროგრამებში, რაც ასევე დამატებით ანაზღაურებას გულისხმობს.
