"თავისუფალი საქართველოს" ინფორმაციით, საჯარო რეესტრი დევნილებს აფხაზეთში საკუთრების მოწმობებს არ აძლევს.
"როგორც საზოგადოებისათვის ცნობილია, რამოდენიმე წლის წინ ხელისუფლება და პირადად სააკაშვილი გამოვიდა ინიციატივით, რომ აფხაზეთში დევნილების კუთვნილ ქონებაზე დაწყებულიყო საჯარო რეესტრის მიერ საკუთრების მოწმობების გაცემა. პომპეზური პრეზენტაციის შემდეგ სააკაშვილმა ხელი მოაწერა (2008 წლის 8 აპრილს) #233 ბრძანებას „აფხაზეთის ავტონომიურ რესპუბლიკასა და ცხინვალის რეგიონში არსებული წინასწარი რეგისტრაციის წესი"-ს შესახებ. რეალურად სააგენტოს დღემდე არ გაუცია არცერთი საკუთრების მოწმობა აფხაზეთში გაურკვეველი მიზეზებით", - ნათქვამია პარტიის განცხადებაში.
მათივე თქმით, ერთ-ერთ ასეთ საქმეზე აფხაზეთიდან დევნილ იური თურქიას, რომელმაც 2005 წელს მოითხოვა საკუთრების მოწმობის მიღება, საჯარო რეესტრის მიერ უარი ეთქვა.
"აღნიშნული მოქმედებით ილახება აფხაზეთის დევნილების კონსტიტუციური უფლება კერძო საკუთრებაზე და გარდა ამისა, დევნილებს უსპობს სამართლებრივ საშუალებას თავისი უფლებების დასაცავად რუსეთის ფედერაციის წინააღმდეგ მიმართოს ადამიანთა უფლებების ევროპულ სასამართლოს სტრასბურგში. აღსანიშნავია, რომ ანალოგიურ საქმეებზე ევროპულმა სასამართლომ უკვე დააკისრა ზიანის ანაზღაურება თურქეთის რესპუბლიკას კვიპროსელი ბერძნების სასარგებლოდ", - აღნიშნულია განცხადებაში.
"თავისუფალი საქართველო" პრეზიდენტ სააკაშვილს, აფხაზეთის უმაღლეს საბჭოს და სხვა კომპეტენტურ ორგანოებს მიმართა, დაუყოვნებლივ მისცენ რეაგირება საჯარო რეესტრის ანტისახელმწიფოებრივ მოქმედებას.
