საქართველოს ახალგაზრდა იურისტთა ასოციაცია სასტუმრო "აფხაზეთში" მცხოვრები დევნილების უფლებების დაცვის მიზნით სასამართლოში სარჩელს შეიტანს.
ამის შესახებ ორგანიზაციის ხელმძღვანელმა თამარ ჩუგოშვილმა დღეს გამართულ პრესკონფერენციაზე განაცხადა.
მისივე განმარტებით, ,,იძულებით გადაადგილებულ პირთა - დევნილთა შესახებ" საქართველოს კანონი საქართველოს შესაბამის ტერიტორიაზე იურისდიქციის აღდგენამდე კომპაქტური განსახლების ობიექტიდან კატეგორიულად კრძალავს დევნილთა გამოსახლებას.
"აქედან გამომდინარე, პოლიცია ვალდებულია, შეწყვიტოს კომპაქტური განსახლების ობიექტიდან დევნილთა გამოსახლების პროცედურები. ამასთან, კანონის თანახმად, საბინაო საკითხებთან დაკავშირებული დავა სასამართლოს გზით უნდა გადაწყდეს", - აღნიშნა ჩუგოშვილმა.
შეგახსენებთ, რომ "აფხაზეთში" შესახლებულ დევნილებს გამოსახლება და რუსთავში განსახლება ემუქრებათ. მათი გამოსახლეობა, სავარაუდოდ, 15 ოქტომბრიდან დაიწყება.
