რუსეთის მიერ საქართველოს წინააღმდეგ 2008 წლის აგვისტოში განხორციელებული აგრესია აშშ-ში, გერმანიასა და კვიპროსშიც დაგმეს.
"შეწყდეს ოკუპაცია და რუსეთმა დატოვოს საქართველოს ტერიტორია", - ამ მოთხოვნით ქართული სათვისტომოს წარმომადგენლებმა ნიუ-იორკში, გაეროს შტაბ-ბინასთან აქცია გამართეს. აქციაში ის ადამიანებიც მონაწილეობდნენ, რომლებიც ინტერვენციის მსხვერპლნი თავად გახდნენ.
მშვიდობიანი აქცია გაიმართა გერმანიაშიც. ქართველები ამჯერად მიუნჰენის ცენტრში შეიკრიბნენ. "სტოპ რუსსია" - ამ ტრანსფარანტებით ეროვნულ სამოსში გამოწყობილი ქართული სათვისტომოს წარმომადგენლები რუსული ჯარების დაუყოვნებლივ გაყვანასა და ოსებისა და აფხაზების ეთნიკური წმენდის შეჩერებას მოითხოვნენ. გერმანიაში მცხოვრები ქართველების გარდა აქციაში ბალტიისპირეთში მყოფი ეთნიკური ქართველებიც მონაწილეობდნენ.
კვიპროსში კი ქართული სათვისტომოს წარმომადგენლები რუსეთის საელჩოსთან შეიკრიბნენ. ისინი დევნილების დაბრუნებასა და ეთნიკური წმენდის შეჩერებას მოითხოვდნენ. პროტესტის გამოსახატად ეთნიკური ქართველები აქციაზე ჩვილ ბავშვებთან ერთად მივიდნენ, მიტინგის შემდეგ კი რუსული აგრესიის შედეგად დაღუპულთა სულების მოსახსენიებელი პანაშვიდი გადაიხადეს.
შეგახსენებთ, რომ რუსეთ-საქართველოს 2008 წლის აგვისტოს ომიდან სამი წელი გავიდა.
