საქართველოს მოსახლეობის 76 %-ს ნეგატიური დამოკიდებულება აქვს რუსეთის ხელისუფლების მიმართ და მხოლოდ 6 % უჭერს მხარს ოფიციალური მოსკოვის პოლიტიკას. 18 %-ი თავს იკავებს კითხვაზე პასუხის გაცემაზე. ასეთი შედეგი აჩვენა კვლევითი ცენტრის, Gallup-ის მიერ ჩატარებულმა კვლევამ.
კვლევები 2010 წელს მსოფლიოს 104 ქვეყანაში ჩატარდა, ამერიკელი სოციოლოგები განმარტავენ, რომ საქართველოს დამოკიდებულება რუსეთის მიმართ პოსტსაბჭოთა სივრცეში გამონაკლისს წარმოადგენს.
კვლევის მიხედვით, რუსეთის პოლიტიკას ყველაზე მეტი მხარდამჭერი ტაჯიკეთში, ყირგიზეთში და აფრიკულ სახელმწიფო მალიში ჰყავს.
საკმაოდ დიდია რუსეთის ხელისუფლების პოლიტიკის მხარდამჭერთა რაოდენობა სომხეთში. წარმოდგენილი სტატისტიკის მიხედვით, მას მხარს უჭერს სომხეთის მოსახლეობის 75 %-ი, ნეგატიური დამოკიდებულება აქვს 7 %-ს ხოლო 17 %-ი თავს იკავებს აღნიშნულ კითხვაზე პასუხის გაცემაზე.
რაც შეეხება აზერბაიჯანს ამ ქვეყანაში პრორუსულად განწყობილია მოსახლოების 54 %-ი, ხოლო ნეგატიურად 19 %-ი.
"მთლიანობაში რუსეთის პოლიტიკისადმი ნდობის ყველაზე მაღალი მაჩვენებელი ორ რეგიონში, დსთ-ს ქვეყნებსა და აფრიკაში ფიქსირდება", - იუწყება Gallup-ი.
რაც შეეხება ამერიკის, ევროპისა და აზიის რეგიონების ქვეყნებს, აქ რუსეთის ხელისუფლების პოლიტიკის მხარდამჭერთა რაოდენობა მინიმალურია.
