"საქართველო-რუსეთი: ისწავლეთ მეზობლობა", - რუსეთ-საქართველოს ომის სამი წლისთავს კრიზისის საერთაშორისო ჯგუფი ეხმაურება და ამ სათაურით მასალას თავის ვებგვერდზე აქვეყნებს.
"2008 წლის აგვისტოს ომის შემდეგ, რომელიც სამხრეთ ოსეთის რეგიონის გამო გაჩაღდა, სამი წელი გავიდა და საქართველოს და რუსეთს შორის სიტუაცია კვლავ მწვავდება. სტაბილურობის აღდგენისა და მყიფე და პოტენციურად ფეთქებადსაშიშ სიტუაციაში პოზიტიური დინამიკის ჩამოყალიბებისთვის, მოლაპარაკებები აუცილებელია. დიპლომატიური ურთიერთობები შეწყვეტილია და მხარეებმა ახლახანს შვეიცარიის შუამავლობით რუსეთის მსოფლიო სავაჭრო ორგანიზაციაში (მსო) გაწევრიანებაზე შეზღუდული მოლაპარაკებები დაიწყეს. მიუხედავად ამისა, მხარეებს აქვთ ისეთი საერთო ინტერესები, როგორებიცაა რეგიონალური უსაფრთხოების გაუმჯობესება, ვაჭრობა და ტრანსპორტი და ისინი მოლაპარაკებებს სწორედ ამ საკითხებზე უნდა აწარმოებდნენ, ნაცვლად ურთიერთბრალდებებისა და მტრული რიტორიკისა, რომელიც დიალოგის აღდგენას კიდევ უფრო ართულებს", - ნათქვამია ორგანიზაციის საიტზე განთავსებულ მასალაში.
მასში ასევე აღნიშნულია, რომ ბრძოლის დასრულების შემდეგ, კომუნიკაციის დეფიციტმა უნდობლობა კიდევ უფრო გააღრმავა.
"საქართველოსთვის რუსეთი ოკუპანტია, რომელიც მის სუვერენიტეტსა და უსაფრთხოებას არყევს. იმ დროს, როდესაც მთელი საერთაშორისო თანამეგობრობა სამხრეთ ოსეთს და აფხაზეთს სუვერენული საქართველოს ნაწილად განიხილავს, რუსეთმა ომის დასრულების შემდეგ ორივე რეგიონი დამოუკიდებელ სახელმწიფოებად აღიარა. არსებული შეფასებებით, მოსკოვს ამ ტერიტორიებზე 7 000-დან 9 000-მდე სამხედრო, უსაფრთხოების და სასაზღვრო ძალები ჰყავს განთავსებული და ორივეგან აშენებს და აღადგენს მუდმივ სამხედრო ბაზებს, რითაც არღვევს 2008 წელს ევროკავშირის შუამავლობით გაფორმებულ ცეცხლის შეწყვეტის შესახებ შეთანხმებას. კონფლიქტის დროს დაახლოებით 20 000 უსახლკაროდ დარჩენილი ადამიანი სახლში დაბრუნებას ვერ ახერხებს და ადმინისტრაციული საზღვრების გასწვრივ დღემდე უბედური შემთხვევები ხდება", - აღნიშნულია მასალაში.
ამასთან, კრიზისის საერთაშორისო ჯგუფის შეფასებით, ჟენევის მოლაპარაკებებმა, რომელიც ცეცხლის შეწყვეტის შესახებ შეთანხმების ფარგლებში შეიქმნა და რომლის მიზანიც უფრო უსაფრთხო გარემოს შექმნა და ჰუმანიტარული საკითხების მოგვარება იყო, მხოლოდ უმნიშვნელო პროგრესს მიაღწია.
"უსაფრთხოებასთან დაკავშირებულ ინციდენტებზე ინფორმაციის გაცვლის მიზნით შეიქმნა ინციდენტების პრევენციისა და რეაგირების მექანიზმი საქართველოს, რუსეთის, სამხრეთ ოსეთისა და აფხაზეთის დე ფაქტო მთავრობებს და ევროკავშირის მონიტორინგის მისიას შორის. თუმცა, მხარეებმა ვერ შეძლეს შეთანხმება უფრო სერიოზულ საკითხებზე, რისთვისაც ჟენევის ფორმატი შეიქმნა, კერძოდ დევნილების დაბრუნებაზე, ხოლო ისეთ ტოქსიკურ ატმოსფეროში როგორიც დღესაა, ეს მოლაპარაკებები შეიძლება კრახით დასრულდეს", - მიიჩნევს ორგანიზაცია.
ამასთან, კრიზისის მართვის საერთაშორისო ჯგუფის აზრით, მხარეებს შორის ურთიერთობის აღდგენაში მეტი წვლილი უნდა შეიტანოს შუამავალმა შვეიცარიამ.
"მხარეები დიდწლად შვეიცარელი დიპლომატების დახმარებით ურთიერთობენ. ბერნი უკვე არის შაუმავლი ვმო-სთან დაკავშირებულ მოლაპარაკებებში და მზდაა ხელი შეუწყოს სხვა ისეთი საკითხების განხილვას, როგორებიცაა მაგალითად ვაჭრობა, ტრანსპორტი ან უსაფრთხოება. საქართველომ და რუსეთმა ომის შემდეგ ხელი მოაწერეს ტრანსპორტთან და ენერგეტიკასთან დაკავშირებულ შეთანხმებებს, რაც იმას ნიშნავს, რომ არსებობს ბაზა თანამშრომლობის განვითარებისთვის იმ პირობებშიც, თუკი პოლიტიკური ნება შეზღუდულია. საკუთარი ინტერესების სასარგებლოდ ნებისმიერი შესაძლებლობის გამოყენებისა და ურთიერთობების ნორმალიზების ხანგრძლივი პროცესის დასაწყებად, მოსკოვმა და თბილისმა უნდა დაიწყონ პირდაპირი მოლაპარაკებები, წინაპირობების გარეშე, მთელ რიგ საკითხებზე შუამავლის დახმარებით, რომელიც საჭიროების შემთხვევაში, შეიძლება იყოს ორივესთვის მისაღები მესამე მხარე. ამან უნდა შეავსოს და არა შეცვალოს ჟენევის პროცესი; - მოუკლონ აფეთქებებსა და ტერორიზმის მხარდაჭერაზე რიტორიკას და დათანხმდნენ ერთობლივ გამოძიებას, ან გამოძიებას, რომელსაც მესამე მხარე ჩაატარებს. ამავდროულად, უსაფრთხოებასთან დაკავშირებული სიტუაციის გამოუმჯობესებისთვის აფხაზეთსა და სამხრეთ ოსეთში და ამ რეგიონების ირგვლივ, საერთაშორისო თანამეგობრობამ:
- უნდა განაგრძოს მოსკოვზე ზეწოლა, რათა ეს უკანასკნელი დაბრუნდეს 2008 წლის კონფლიქტამდელ პოზიციებზე, ხელი შეუწყოს დევნილების სახლებში დაბრუნებას და დაუშვას ევროკავშირის მონიტორინგის მისია სამხრეთ ოსეთისა და აფხაზეთის ტერიტორიაზე; და მუწოდოს მხარეებს გაცვალონ ინფორმაცია თავიანთ უსაფრთხოების ძალებსა და მათ მოქმდებებზე ადმინისტრაციული საზღვრების გასწვრივ", - აღნიშნულია მასალაში.
