ადგილობრივმა მუნიციპალიტეტმა, პორტის ხელმძღვანელობამ, საკრებულომ და სანაპირო დაცვის თანამშრომლებმა გვირგვინებით შეამკეს დაღუპულთა მემორიალი. იქვე, ფოლკლორულმა ანსამბლმა რამდენიმე საგალობელი შეასრულა.

2008 წლის 8 აგვისტოს რუსეთის მიერ ფოთის პორტის დაბომბვისას მეშვიდე ტერმინალზე 12 ადამიანი დაიღუპა და 83 მძიმედ დაიჭრა. მათ შორის იყვნენ მშვიდობიანი მოქალაქეებიც.

აგვისტოს ომში დაღუპულ ქართველ გმირებს პატივი ქუთაისშიც მიაგეს და მემორიალი "დედის ცრემლები" ყვავილებით შეამკეს.

აქციაში მონაწილეობა იმერეთის მხარეში სახელმწიფო რწმუნებულმა ლაშა მაქაცარიამ და ქუთაისის მერმა გიორგი თევდორაძემ მიიღეს. დაღუპული გმირების სულის უკვდავსაყოფად ქუთათელ-გაენათელმა მიტროპოლიტმა მეუფე კალისტრატემ პარაკლისი აღავლინა.

2008 წლის რუსეთ-საქართველოს ომში 8 ქუთაისელი ახალგაზრდა დაიღუპა, მათ უკვდავსაყოფად 2010 წლის 8 აგვისტოს ქუთაისში მემორიალი გაიხსნა, რომლის ავტორი ცნობილი მოქანდაკე და არქიტექტორი გივი თოდაძეა.