"ომი, რომელიც სამი წლის წინ რუსეთს და მის პატარა პოსტსაბჭოთა მეზობელს საქართველოს შორის გაჩაღდა, მოულოდნელი, უკიდურესად სასტიკი და ხანმოკლე იყო და ზაფხულის მოულოდნელ შტორმს უფრო გავდა, რომელიც წელიწადის ამ დროს კავკასიის მთებიდან ეშვება ხოლმე", - რუსეთ-საქართველოს ომის სამი წლისთავს უცხოური პრესა ეხმაურება,
გამოცემა Christian Science Monitor -ი 2008 წლის აგვისტოს ომს ვრცელ სტატიას უძღვნის და წერს, რომ პეიზაჟის გაწმენდვის ნაცვლად, აგვისტოს ომს გაყინული ურთიერთობების, ბრაზის გაძლიერებისა და არსებული შეხედულებების განმტკიცების ხანგრძლივი პერიოდი მოჰყვა.
"საქართველო, რომელმაც 2003 წლის „ვარდების რევოლუციის" შემდეგ დასავლეთთან დაახლოება დაიწყო, საკუთარ თავს პოსტსაბჭოთა სივრცეში დემოკრატიის მაცნედ მიიჩნევს. რუსეთისთვის კი საქართველო აჯანყებული მეზობელია, რომელსაც არალეგიტიმური პრეზიდენტი მართავს", - ნათქვამია სტატიაში.
მასალის ავტორის შეფასებით, რუსულ-ქართული ანტაგონიზმის მიზეზი არის ის, რომ საქართველომ მსოფლიოს ამ ნაწილში ლიბერალური დემოკრატიული სახელმწიფოს შექმნის რეალური შესაძლებლობის დემონსტრირება მოახდინა და რომ საქართველო რუსეთის გავლენის ქვეშ მყოფი სხვა სახელმწიფოებისთვის შეიძლება მაგალითად იქცეს.
ამის მიუხედავად, ჟურნალისტი ომის დაწყებაში საქართველოს ადანაშაულებს და წერს, რომ ომი 7 აგვისტოს ქართველების მხრიდან სამხრეთ ოსეთის დედაქალაქ ცხინვალის მასობრივი დაბომბვითა და მასზე შეიარაღებული თავდასხმით დაიწყო.
"მიუხედავად იმისა, რომ თბილისი კვლავ თავის ოფიციალურ პოზიციაზე რჩება და დღესაც ამტკიცებს, რომ ომი რუსეთმა პროდასავლელი პრეზიდენტის მიხეილ სააკაშვილის დამხობის მიზნით დაიწყო, როგორც ჩანს არავის ეჭვი არ ეპარება იმაში, რომ ომი 7 აგვისტოს ქართველების მხრიდან სამხრეთ ოსეთის დედაქალაქ ცხინვალის მასობრივი დაბომბვითა და მასზე შეიარაღებული თავდასხმით დაიწყო. თავდასხმის დროს რამდენიმე რუსი მშვიდობისმყოფელი დაიღუპა, რომლებიც რეგიონში საერთაშორისო შეთანხმებების საფუძველზე მსახურობდნენ",- აღნიშნულია სტატიაში.
