"დემოკრატიული მოძრაობა" ჟურნალისტთა ეთიკის საბჭოს და მედიაექსპერტებს ტელეკომპანიების მუშაობის შესწავლას სთხოვს. როგორც "ჯი-ეიჩ-ენს" ბურჯანაძის პარტიიდან აცნობეს, ხელისუფლების მხრიდან კონტროლირებადი მედიის საქმიანობას მეტი ყურადღება უნდა დაეთმოს.
"დემოკრატიული მოძრაობა" რიგ ტელეკომპანიას პარლამენტის შენობის წინ 26 მაისის ღამეს მომხდარი მოვლენების არაობიექტურ გამოძიებაში ადანაშაულებს და აცხადებს, რომ "ხელისუფლების მიერ მართული რამდენიმე რადიო და ბეჭდური მედიის წარმომადგენელი, ურცხვად, ყოველგვარი მტკიცებულების გარეშე ავრცელებდა სააკაშვილის რეჟიმის მიერ წინასწარ დაგეგმილ ტყუილს, რომლის მიზანიც ნინო ბურჯანაძისა და მისი თანამებრძოლების მკვლელებად გამოცხადება იყო".
"საუბარია შსს-ის მიერ გავრცელებულ ცნობილ ვიდეოკადრებზე, რომლებზედაც თითქოსდა ასახული იყო ბურჯანაძის ესკორტის მანქანის ადამიანზე შეჯახება. ლევან სამხარაულის სახელობის სასამართლო ექსპერტიზის ეროვნულმა ბიურომ დასკვნა გამოაქვეყნა, რომლის მიხედვითაც, 26 მაისს შსს-ის მიერ გავრცელებულ ვიდეოკადრებში ბურჯანაძის ესკორტის მიერ ადამიანთან ან რაიმე უცხო სხეულთან შეჯახება არ ფიქსირდება", - ნათქვამია განცხადებაში.
