ისრაელმა სამხედროებს საქართველოში ჩასვლა აუკრძალა. ინფორმაციას ამის შესახებ "ამერიკის ხმა" ავრცელებს.
მათი ინფორმაციით, საქართველო პირველად მოხვდა იმ 36 სახელმწიფოსა და რეგიონს შორის, რომელიც ისრაელის ტერორიზმთან ბრძოლის შტაბმა შავ სიაში შეიყვანა. შტაბი ისრაელის ეროვნული უსაფრთხოების საბჭოს სტრუქტურული ნაწილია, რომელიც ასეთი სიას ყოველწლიურად აქვეყნებს.
"შავ სიაში მოხვედრილ ქვეყნებში გამგზავრება ისრაელის არმიის ოფიცრებსა და სერჟანტებს ოფიციალურად ეკრძალებათ. ახალი სპეციალური ბრძანება ამის თაობაზე უკვე გამოსცა ცახალის გენერალური შტაბის ოპერატიულმა განყოფილებამ. საქართველოს გარდა, შავ სიაში ასევე მოხვდნენ აზერბაიჯანი, თურქეთი, ტაილანდის სამხრეთის რაიონები, ეგვიპტე, ტუნისი, იორდანია, ქაშმირი, ჩეჩნეთი და კენიის რამდენიმე რეგიონი", _ იუწყება "ამერიკის ხმა".
მათივე ინფორმაციით, გავრცელებულ განცხადებაში ნათქვამია, რომ შავ სიაში მოხვედრილ ქვეყნებში არსებობს მეოთხე დონის საფრთხე, რაც ისრაელის კანონმდებლობით მუდმივ პოტენციურ საფრთხეს ნიშნავს.
