სიღნაღში, საბავშვო მწერლის, იროდიონ ევდოშვილის სახლ - მუზეუმი ინგრევა. შენობა ავარიულ მდგომარეობაშია. უკვე რამდენიმე წელია, რაც მეორე სართულთან დამაკავშირებელი კიბე მთლიანად მორყეულია და ზედა სართულზე ასვლა შეუძლებელია. კედლებში წვიმის წყალი ჟონავს და ექსპონატები ობდება.
„იმის გამო, რომ მეორე სართულზე ვერ ავდივართ, ყველა ნივთი მუზეუმის პირველ სართულზე განვათავსეთ. პრობლემა ადგილობრივი გამგეობისთვის ცნობილია, თუმცა მოუგვარებელია", - განუცხადა კახეთის საინფორმაციოს ცენტრს მუზეუმის დირექტორმა მარინა თევდორაშვილმა.
კახეთის საინფორმაციო ცენტრთან საუბარში სამუზეუმო გაერთიანების დირექტორმა ნატო უსენაშვილმა აღნიშნა, რომ რაიონის გამგებელი საქმის კურსში არაერთხელ ჩააყენა, მაგრამ სარეაბილიტაციო სამუშაოები ამ დრომდე არ დაიწყო.
იროდიონ ევდოშვილის სახლ - მუზეუმი 1956 წლიდან ფუნქციონირებს. მუზეუმში დაცულია მწერლის მემორიალური ნივთები, ყოფითი და ეთნოგრაფიული მასალა - ჭურჭელი, ავეჯი, ორი ფერწერული ტილო, ფოტო და დოკუმენტური მასალა, ასევე პოეტის ლექსების სხვადასხვა პერიოდის კრებულები.
