სრულიად საქართველოს კათალიკოს პატრიარქმა, უწმინდესმა და უნეტარესმა ილია II-მ მოსკოვისა და სრულიად რუსეთის პატრიარქთან კირილთან ერთად კიევო-პეჩორის ლავრაში ღვთისმსახურების ჩატარების შემდეგ რუსეთსა და საქართველოს შორის ამჟამად არსებულ ურთიერთობებს დაუშვებელი უწოდა და რუსეთის პატრიარქს მოუწოდა ორ ქვეყანას შორის მეგობრული ურთიერთობების აღდგენას დაეხმაროს და ხელი შეუწყოს.
"ის პოლიტიკური ურთიერთობები, რომლებიც რუსეთსა და საქართველოს შორის არსებობს სრულიად დაუშვებელი ურთიერთობებია. იმიტომ, რომ ჩვენ მოძმე მართლმადიდებელი ხალხები ვართ. ეს ურთიერთობები ჩვენი მტრების შურის გამო შეიქმნა. ყველაფერი უნდა გავაკეთოთ იმისათვის, რომ აღდგენილ იქნეს მეგობრობა და ძმობა ჩვენს ხალხებსა და სახელმწიფოებს შორის", _ ბრძანებს სრულიად საქართველოს პატრიარქი.
უწმინდესი ასევე აღნიშნავს, რომ მას იმედი აქვს პატრიარქ კირილის სიბრძნისა.
"მე თქვენ მრავალი წელია გიცნობთ, თქვენ რუსეთისა და საქართველოს ისტორიაში როგორც მშვიდობისმყოფელი უნდა შეხვიდეთ, უნდა შეხვიდეთ როგორც ადამიანი, რომელმაც მოიტანა მშვიდობა ორ ხალხს შორის", _ ბრძანა ილია II-მ და აღნიშნა, რომ კიევო-პეჩორის ლავრაში მან ლოცვა აღავლინა იმისათვის, რომ მშვიდობა და კეთილდღეობა მეფობდეს რუსეთსა და საქართველოში".
საქართველოს პატრიარქმა მადლობა გადაუხადა მოსკოვისა და სრულიად რუსეთის პატრიარქს და კიევის მიტროპოლიტს მისი მიწვევისათვის.
"მადლობა სითბოსთვის, თბილი მიღებისათვის, იმედი მაქვს, კეთილი ძვრებისა რუსეთსა და საქართველოს შორის ურთიერთობებში", _ ბრძანა საქართველოს პატრიარქმა.
"უნდა აღვადგინოთ მშვიდობა ხალხებს შორის და ერთმორწმუნე ქვეყნებს შორის", _ განაცხადა საპასუხოდ რუსეთის პატრიარქმა.
