რესპუბლიკური პარტიის ერთ-ერთი ლიდერი და საკრებულოს დეპუტატი თინა ხიდაშელი 2002 წლის 25 დეკემბრის მიწისძვრის შედეგად დაზარალებული ოჯახებისთვის თბილისის მერიისგან ბინების საკუთრებაში გადაცემას მოითხოვს
როგორც ხიდაშელმა დღეს გამართულ ბრიფინგზე განაცხადა, აღნიშნული მიწისძვრიდან მეორე დღესვე საკრებულოს სხდომა გაიმართა მიხეილ სააკაშვილის ხელმძღვანელობით, სადაც მიღებულ იქნა გადაწყვეტილება რომლის თანახმადაც ყველა დაზარალებულს ბინა საკუთრებაში გადაეცემოდა.
"თუმცა მიხეილ სააკაშვილის მიერ შეთავაზებული ეს ინიციატივა დღემდე ბოლომდე არ შესრულებულა. 50 ოჯახია ისეთი, რომელიც ითხოვს ბინის საკუთრებაში გადაეცემას და მათი ეს მოთხოვნა ლეგიტიმურია. მიმიდნარე წლის მაისის თვეში შეიკრიბა საკრებულოს ქონების მართვის კომისია და იმსჯელა ამ საკითხზე. აღნიშნულმა კომისიამ მიიღო სარეკომენდაციო წერილი, რომლის მიხედვითაც ამ 50 ოჯახიდან 45-სთვის ბინა უნდა დაეკანონებინათ. ეს მოთხოვნა გადაიგზავნა თბილისის მერიის ქონების მართვის სააგენტოში და მათ შეეძლოთ ეს შეთავაზება დაემკიცებინათ პირველივე თბილისის მთავრობის სხდომაზე. თუმცა ეს ადამიანები დღემდე ცხოვრობენ დაუკანონებელ სახლებში. თბილისის მერია კი არაფერს არ აკეთებს იმისთვის, რათა ეს პრობლემა მოაგვაროს. თუ უახლოეს მომავალში არ მოგვარდა აგვისტოში გასამართ საკრებულოს სხდომაზე აუცილებლად მოვითხოვ რომ ეს ბრძანებულებები გადაიხედოს და ამ 50 ოჯახს ბინები დაუკანონდეს" - განაცხადა ხიდაშელმა.
ხიდაშელთან ერთად ბრიფინგს ესწრებოდნენ მიწისძვრის შედეგად დაზარალებული ოჯახების წევრებიც. მათი თქმით, ისინი დღემდე ელიან მერიისგან წერილს.
