22 ივლისს „ქართულმა პარტიამ" განცხადებით მიმართა საქართველოს მთავარ პროკურორს მურთაზ ზოდელავას და შინაგან საქმეთა მინისტრს ვანო მერაბიშვილს, დაიწყოს სისხლის სამართლის საქმის გამოძიება ჩადენილი დანაშაულებრივი ნიშნების შემცველი ქმედების ირგვლივ, რომელიც თბილისში სამარშრუტო ტაქსებით მგზავრობის ღირებულების გაზრდას უკავშირდება. მურთაზ ზოდელავას და ვანო მერაბიშვილის სახელზე განცხადება, „ქართული პარტიის" სახელით, პოლიტსაბჭოს წევრმა სოფიო ხორგუანმა შეიტანა.
„ბოლო პერიოდში ყველამ ვნახეთ სხვადასხვა მედიასაშუალებებში გავრცელებული მიკროავტობუსების მძღოლების განცხადებები, რომლებშიც საუბარია მათ მიმართ განხორციელებული ზეწოლისა და მუქარის გზით, მგზავრობის უფრო მაღალი ტარიფის დაწესებაზე. ასეთი ქმედებები შეიცავს სისხლის სამართლის დანაშაულის ნიშნებს. ეს არის იძულება, მუქარა და შრომის უფლების ხელყოფა. ამიტომ, სამართალდამცავმა სტრუქტურებმა აუცილებლად უნდა გამოიძიონ, ვინ იყვნენ ის ნიღბიანი და ფორმიანი ადამიანები, რომლებიც მძღოლებზე ზეწოლას ახორციელებდნენ", - აღნიშნა მთავარ პროკურატურაში განცხადების შეტანის დროს სოფიო ხორგუანმა.
განცხადებაში აღნიშნულია, რომ მასმედიაში გამოქვეყნებული ინფორმაცია შეიცავს საქართველოს სისხლის სამართლის კოდექსის 150-ე, 151-ე 168-ე მუხლებით გათვალისწინებული დანაშაულის ნიშნებს და მძღოლების გადმოცემით, ფორმიანი და ნიღბიანი პირები, სავარაუდოდ, შესაძლებელია პოლიციის თანამშრომლები ყოფილიყვნენ.
