საქართველოში უცხოელთა რეგისტრაციისთვის დადგენილი წესების დარღვევისთვის ჯარიმის ოდენობა 5 ლარიდან 100 ლარამდე იზრდება. აღნიშნულის შესახებ ნათქვამია "ადმინისტრაციულ სამართალდარღვევათა კოდექსის" განახლებულ ვერსიაში.
დღეს არსებული ნორმის თანახმად, საქართველოს მოქალაქეთა და საქართველოში მცხოვრებ უცხოელთა რეგისტრაციისთვის დადგენილი წესების დარღვევით ცხოვრება იწვევდა დაჯარიმებას 5 ლარის ოდენობით.
საკანონმდებლო ინიციატივაში კი ნათქვამია, რომ საქართველოში უცხოელთა რეგისტრაციისთვის დადგენილი წესების დარღვევით ცხოვრება გამოიწვევს ჯარიმას 100 ლარის ოდენობით.
ასევე უცხოელი მოქალაქის ყოფნა საქართველოში კანონიერად ყოფნის ვადის ამოწურვის შემდეგ 10 დღიდან 3 თვემდე პერიოდის განმავლობაში გამოიწვევს ჯარიმას 200 ლარის ოდენობით, ხოლო უცხოელი მოქალაქის ყოფნა საქართველოში კანონიერად ყოფნის ვადის ამოწურვის შემდეგ 3 თვეზე მეტ ხანს გამოიწვევს ჯარიმას 400 ლარის ოდენობით.
