"თელასის" მიერ 2011 წელს გამოყოფილი თანხების საშუალებით ფონდმა "ლაზარე" გახსნა ორი სახელოსნო - სამკერვალო და ხის დამამუშავებელი. გარდა ამისა, კომპანიის სახსრები ხმარდება სახელოსნოების ფუნქციონირებისათვის აუცილებელი მასალების შესყიდვას.
2010 წელს კომპანიის ფინანსური მხარდაჭერით შეიქმნა ჯგუფი ლითონისა და ხის დამუშავების ტექნოლოგიების შესასწავლად. ასევე, მოეწყო და სათანადოდ აღიჭურვა სამკერვალო და სამხატვრო სახელოსნოები.

ლითონისა და ხის დამუშავების ტექნოლოგიების შესასწავლად პირველი სახელოსნოები ფონდმა "ლაზარე" 2006 წლის გაზაფხულზე გახსნა. ამ სახელოსნოებში ახალგაზრდებს შეუძლიათ სასარგებლო და საინტერესო სპეციალობებს სრულიად უსასყიდლოდ დაეუფლონ. ამჟამად სახელოსნოებში 100-მდე მოზარდი სწავლობს.

წარმატებულ მოზარდთა ჯგუფებისთვის ტარდება ბიზნეს კურსები, რათა ახალგაზრდებმა საქმიანობა დამოუკიდებლად განაგრძონ. ამ კატეგორიის მოზარდების პრობლემებით საზოგადოების დაინტერესების მიზნით, ფონდი რეგულარულად აწყობს მათი ნამუშავრების გამოფენა-გაყიდვებს, ამზადებს სატელევიზიო გადაცემებს, რაც ბავშვებს სპეციალობის უკეთ დაუფლების სტიმულს აძლევს.

ერთ-ერთი ასეთი გამოფენა-გაყიდვა, რომლის ორგანიზატორი, ისევე როგორც გასულ წელს, კომპანია "თელასია", სრულიად საქართველოს კათოლიკოს-პატრიარქის, უწმინდესისა და უნეტარესის ილია II ლოცვა-კურთხევით გაიმართა. ღონისძიება საგამოფენო დარბაზ "ტიფლის ავენიუში" 15 ივლისს ჩატარდა. გამოფენა-გაყიდვაზე წარმოდგენილი იქნა ფერადი ლითონებისგან დამზადებული სამკაულები და ქალის ტანსაცმელი. ბავშთა ნამუშევრების გაყიდვიდან შემოსული თანხა სახელოსნოების განვითარებას მოხმარდება.

Gგამოფენას კომპანია "თელასის" საზოგადოებასთან ურთიერთობის დეპარტამენტის ხელმძღვანელი ვალერი ფანცულაია და საქართველოს საპატრიარქოს საქველმოქმედო ფონდ `ლაზარეს~ ხელმძღვანელი, სასულიერო აკადემიის რექტორი, პროტოპრესვიტერი მამა გიორგი Pზვიადაძე დაესწრნენ.

საქართველოს საპატრიარქოს საქველმოქმედო ფონდი "ლაზარე" 1994 წლის 1 აპრილს დაარსდა. საქველმოქმედო საქმიანობას ფონდი ადგილობრივი და უცხოელი დონორების შემოწირულობებით ახორციელებს.