დღეს, 13 ივლისს, 12:30 საათზე, ფინანსთა მინისტრი დიმიტრი გვინდაძე "თავისუფალი ეკონომიკური აქტის" შესახებ ისაუბრებს. ბრიფინგის გამართვისა და აქტის შესახებ საზოგადოების ინფორმირება ფინანსთა მინისტრს დღეს პრემიერ-მინისტრმა მთავრობის სხდომაზე დაავალა.
როგორც დღეს მთავრობის სხდომაზე პრემიერ-მინისტრმა ნიკოლოზ გილაურმა განაცხადა, თავისუფალი ეკონომიკური აქტი, რომელიც პარლამენტმა გასულ კვირას მიიღო, ქვეყანაში დამატებითი ინვესტიციების მოსაზიდად და ინვესტორების სტაბილურობისთვის მნიშვნელოვანი ფაქტორია.
პრემიერ-მინისტრმა ფინანსთა მინისტრს დაავალა, პრესას და საზოგადოებას "თავისუფალი ეკონომიკური აქტის" თითოეული მუხლი განუმარტოს, იმავდროულად, აღნიშნული აქტის შესახებ დეტალური ინფორმაცია მიაწოდოს კერძო სექტორს.
"პარლამენტმა "თავისუფალი ეკონომიკური აქტი" უკვე მიიღო, რაც არის უმნიშვნელოვანესი ეკონომიკური კანონი. ამ კანონზე ძალიან დიდხანს ვიმუშავეთ. 2 თვის განმავლობაში, როგორც პარლამენტის, ასევე მთავრობის წარმომადგენლები იყვნენ ჩართულნი მის შემუშავებაში და ასევე, მასში ჩავრთეთ ბევრი საერთაშორისო ექსპერტი. შევისწავლეთ ძალიან ბევრი ქვეყნის გამოცდილება ამ მიმართულებით და საბოლოოდ, ეკონომიკური თვალსაზრისით მნიშვნელოვანი კანონი შევარჩიეთ. "თავისუფალი ეკონომიკური აქტი" არის გრძელვადიანი ეკონომიკური სტაბილურობის კანონმდებლობა, სადაც გაწერილია მაკროეკონომიკური პარამეტრები, რითაც შემდგომ მთავრობამ უნდა იმუშაოს", - განაცხადა პრემიერ-მინისტრმა.
გილაურის თქმით, "თავისუფალ ეკონომიკურ აქტში" წერია, რომ საბიუჯეტო დეფიციტი 3 პროცენტს არ უნდა აღემატებოდეს, ხოლო მაქსმალური ვალი მშპ-სთან მიმართებაში 60 პროცენტზე მაღლა არ უნდა იყოს. რაც შეეხება მაქსიმალურ ხარჯს, ის მშპ-სთან მიმართებაში 30 პროცენტს უნდა შედგენდეს.
"ეს არის სამი პრიორიტეტი. მთავრობას შეუძლია ერთჯერადად დაარღვიოს ეს ზედა ზღვარი, თუმცა გრძელვადიან პერიოდში ამ ზღვარს უნდა დაუბრუნდეს. ეს არის სამი ძირითადი პარამეტრი, რომელიც უზურნველყოფს იმას, რომ მთავრობა არ გაკოტრდება, ქვეყნის ვალი არ გაიზრდება და კერძო სექტორს არ დააწვება. მთავრობის წილი ეკონომიკაში 30 პროცენტზე მაღალი არ იქნება. ძალიან ხშირად ინვესტორები გვეუბნეოდნენ, რომ მათ მოსწონდათ საქართველოს კანონმდებლობა, მოსწონდათ არსებული ეკონომიკური რეგულაციები, თუმცა მათი ინვესტიციების დათვლა ქვეყანაში იყო 15-20-25-30 წლებზე და სად იყო გარანტია იმისა, რომ ეს ეკონომიკური მიმართულება არ შეიცვლებოდა", - აღნიშნა გილაურმა.
მისი თქმით, ხელისუფლებამ ინვესტორთა ამ შეკითხვეს ოფიციალური პასუხი უკვე მოუძებნა და პარლამენტის მიერ მიღებულია "თავისუფალი ეკონომიკური აქტი", რაც ინვესტორებს ქვეყანაში სტაბილურობის განცდას გაუზრდის და მათ კარგად ეცოდინებათ, როგორი იქნება ეკონომიკა გრძელვადიან პერიოდში.