ხვალ, 5 ივლისს, "ღია საზოგადოება-საქართველო" არასრულწლოვანთა სპეციალური დაწესებულების მონიტორინგის შედეგებს გამოაქვეყნებს.
კვლევა არასრულწლოვანთა სასჯელაღსრულების დაწესებულებაში ჯანდაცვის სტანდარტების შეფასებას, ასევე მოზარდების ფიზიკურ და ფსიქიკურ ჯანმრთელობასთან დაკავშირებულ საკითხებს მოიცავს.
2010 წელს სასჯელაღსრულების, პრობაციისა და იურიდიული დახმარების საკითხთა სამინისტროსთან გაფორმებული მემორანდუმის საფუძველზე, ფონდმა "ღია საზოგადოება -საქართველომ" და "წამების მსხვერპლთა რეაბილიტაციის ცენტრმა" არასრულწლოვანთა დაწესებულებაში ექვსთვიანი კვლევა ჩაატარეს. ასეთი კვლევა საქართველოში პირველად ჩატარდა.
მონიტორინგის მიზანი ავჭალის არასრულწლოვანთა სასჯელაღსრულების დაწესებულებაში ჯანდაცვის სფეროს ძირითადი პრობლემებისა და საჭიროებების იდენტიფიცირება, სამედიცინო მომსახურების ხელმისაწვდომობის ხელის შემშლელი ფაქტორების გამოვლენა, გამომწვევი მიზეზების ანალიზი და რეკომენდაციების შემუშავება იყო.
კვლევის შედეგების პრეზენტაციას სასჯელაღსრულების, პრობაციისა და იურიდიული დახმარების საქმეთა სამინისტროს, არასრულწლოვანთა დაწესებულების, შრომის, ჯანმრთელობისა და სოციალური დაცვის სამინისტროს წარმომადგენლები და არასამთავრობო ორგანიზაციები დაესწრებიან.
