საქართველოს მთლიანმა საგარეო ვალმა 2011 წლის 31 მარტის მდგომარეობით 10 184.6 მლნ აშშ დოლარი შეადგინა; აქედან, 3 485.6 მლნ აშშ დოლარი იყო სამთავრობო სექტორის ვალი (34.2%), 891.4 მლნ აშშ დოლარი (8.8%) - ეროვნული ბანკის, 1 778.5 მლნ აშშ დოლარი (17.5%) - საბანკო სექტორის, 1 746.0 მლნ აშშ დოლარი (17.1%) - სხვა სექტორებისა და 2 283.1 მლნ აშშ დოლარი (22.4%) - კომპანიათაშორისი ვალი. მთლიანი საგარეო ვალის 95.1 პროცენტი დენომინირებულია უცხოური ვალუტით.
2011 წლის პირველ კვარტალში საქართველოს მთლიანი საგარეო ვალი 462.1 მლნ აშშ დოლარით გაიზარდა, აქედან ოპერაციულ ცვლილებებზე მოდის 280. 9 მლნ აშშ დოლარი, საკურსო ცვლილებებზე - 153.9 მლნ აშშ დოლარი, ხოლო ფასის და სხვა ცვლილებაზე - 27.3 მლნ აშშ დოლარი.
სამთავრობო სექტორის უცხოური ვალდებულებები საანგარიშო პერიოდში 142.9 მლნ აშშ დოლარით გაიზარდა. აქედან ოპერაციულ ცვლილებების შედეგად ზრდა 51.9 მლნ აშშ დოლარს შეადგენს, ხოლო საკურსო ცვლილებით ზრდა კი 74.0 მლნ აშშ დოლარს.
საანგარიშო პერიოდში საქართველოს ეროვნული ბანკის საგარეო ვალი 15.0 მლნ აშშ დოლარით გაიზარდა. აქედან, ოპერაციული ცვლილების შედეგად გვქონდა ეროვნული ბანკის ვალდებულებების 10. 7 მლნ აშშ დოლარით შემცირება და საკურსო ცვლილების შედეგად 25.7 მლნ აშშ დოლარით ზრდა.
საბანკო სექტორის უცხოური ვალდებულებები 184.5 მლნ აშშ დოლარით გაიზარდა, რაც გამოწვეულია ბანკების მოკლევადიანი ვალდებულებების ზრდით, 235.8 მლნ აშშ დოლარით. ბანკების გრძელვადიანი საგარეო ვალდებულებები საანგარიშო პერიოდში 51.3 მლნ აშშ დოლარით შემცირდა. საბანკო სექტორის მოკლევადიანი ვალდებულებების ზრდის 96.6 პროცენტი, რაც რაოდენობრივად 227,9 მლნ აშშ დოლარია, ოპერაციულ ცვლილებებზე მოდის. საკურსო ცვლილებების გამო, საბანკო სექტორის საგარეო ვალი, 2011 წლის პირველ კვარტალში 9.0 მლნ აშშ დოლარით გაიზარდა.
56.1 მლნ აშშ დოლარით გაიზარდა სხვა სექტორების საგარეო ვალდებულებები, აქედან 6,5 მლნ აშშ დოლარი, რაც სხვა სექტორების გაზრდილი ვალდებულებების 11,7 პროცენტს შეადგენს, არასაბანკო საფინანსო ორგანიზაციების საგარეო ვალდებულებებზე მოდის. სხვა სექტორების საგარეო ვალი, ოპერაციული ცვლილების შედეგად, 23.3, საკურსო ცვლილებით - 27.7 მლნ აშშ დოლარით, ხოლო ფასისა და სხვა ცვლილებების შედეგად კი 5.0 მლნ. აშშ დოლარით გაიზარდა.
საანგარიშო პერიოდში, ზრდა განიცადა უცხოურმა კომპანიათაშორისმა სესხებმა, სადაც მატებამ 63.7 მლნ აშშ დოლარი შეადგინა. კომპანიათაშორისი სესხები ოპერაციული ცვლილების შედეგად 40.9 მლნ აშშ დოლარით, ხოლო საკურსო და სხვა ცვლილებების შედეგად შესაბამისად 17.5 და 5.2 მლნ აშშ დოლარით გაიზარდა.
საგარეო ვალდებულებების ზრდა დაფიქსირდა ძირითადად უცხოური ვალუტით. საანგარიშო პერიოდის განმავლობაში უცხოური ვალუტით დენომინირებული საგარეო ვალდებულებების მოცულობა 443.4 მლნ აშშ დოლარით გაიზარდა და პერიოდის ბოლოსათვის 9681.0. მლნ აშშ დოლარი შეადგინა. ეროვნული ვალუტით დენომინირებული საგარეო ვალი გაიზარდა 18.7 მლნ აშშ დოლარით და 503.6 მლნ აშშ დოლარს გაუტოლდა.
მთლიანი საგარეო ვალის სტატისტიკა ჰარმონიზებულია საგადასახდელო ბალანსთან. იგი მოიცავს სახელმწიფო (სამთავრობო სექტორი და ეროვნული ბანკი) და კერძო სექტორის (საბანკო და სხვა სექტორები) საგარეო ვალს.