დუშეთის მუნიციპალიტეტის სოფელ ზემო მლეთაში, მდინარე არაგვში 3 წლის ხატია ნაზღაიძე დაიხრჩო. ბავშვის წყალში ჩავარდნა არავის დაუნახავს. გაუჩინარებული ბავშვის ძებნა ახლობლებმა და მეზობლებმა მალევე დაიწყეს. გარდაცვლილი ბავშვის ცხედარი სახლიდან დაახლოებით 400 მეტრის მოშორებით იპოვეს.
როგორც "ჯი-ეიჩ-ენს" მცხეთა-მთიანეთის საინფორმაციო ცენტრიდან აცნობეს, 3 წლის ხატია ნაზღაიძის ოჯახი ბოლო ერთი წლის განმავლობაში სიცოცხლის მაღალი რისკის ზონაში ცხოვრობს. გასული წლის აპრილში მლეთის ხევიდან ჩამოტანილმა ნაშალმა თეთრი არაგვი გადაკეტა და დაგუბებულმა წყალმა 8 ოჯახის საცხოვრებელი სახლის პირველი სართული ქვიშითა და წყლით აავსო. სტიქიური პროცესების გამო მდინარის კალაპოტმა მაღლა აიწია, რის გამოც მდინარე თეთრი არაგვი სახლებთან ახლოს, 5 მ-ის მოშორებით გადის.
გარემოს ეროვნული სააგენტოს გეოლოგიური სამსახურის დასკვნის თანახმად, ზემო მლეთაში ბუნებრივი სტიქიის პროცესის შეჩერება შეუძლებელია.
სტიქიისგან დაზარალებული მოსახლეობა ერთი წელია გასახლებას უშედეგოდ ითხოვს.
