რუსთავის იუსტიციის სახლს ყაზახეთის სამთავრობო დელეგაცია ეწვია.
ყაზახი სტუმრები სა¬ქართველოს იუსტიციის სამინისტროს ახალი ბრენდის - იუსტიციის სახლის კონცეფციასა და სახელმწიფო მომსახურების სფეროში ქვეყანაში გატარებული რეფორმების შედეგებს გაეცნენ.
იუსტიციის სახლი - იუსტიციის სამინისტროს სერვისების სრულიად ახალი კონცეფციის მქონე საჯარო დაწესებულებაა, სადაც სამოქალაქო რეესტრის სააგენტოს, საჯარო რეესტრის ეროვნული სააგენტოს, ეროვნული არქივის, აღსრულების ეროვნული ბიუროს, ნოტარიუსთა პალატის სერვისები იდეურად და სისტემურად არის გაერთიანებული, რაც მომხმარებელთა სწრაფ და კვალიფიციურ მომსახურებას უზრუნველყოფს - მოქალაქე ყველა სერვისს ერთ სივრცეში იღებს.
ყაზახეთის დელეგაციის ვიზიტის მიზანი საქართველოში გატარებული რეფორმების შედეგების გაცნობაა. სამთავრობო დელეგაცია საქართველოს იუსტიციის სამინისტროს საჯარო და სამოქალაქო რეესტრის სააგენტოებს, აღსრულების ეროვნულ ბიუროს, მონაცემთა გაცვლის სააგენტოსაც ესტუმრა, სადაც დეტალურად გაეცნო ქართულ გამოცდილებას.
