საქართველოში ჩერქეზთა გენოციდისადმი მიძღვნილი მემორიალი გაიხსნება.
ამის შესახებ ჟურნალისტებს დიასპორისა და კავკასიის საკითხებში საპარლამენტო კომიტეტის თავმჯდომარე ნუგზარ წიკლაურმა განუცხადა.
მისივე თქმით, ასევე დაგეგმილია ჩერქეზული კულტურის ცენტრის დაარსებაც.
"სავარაუდოდ, მემორიალი სადმე შავიზღვისპირეთში იქნება, რადგან ჩერქეზებს ტრადიცია ჰქონდათ, რომ გენოციდის დღის აღნიშვნის დროს, პირდაპირ ზღვაში ყრიდნენ ყვავილებს,", - განაცხადა წიკლაურმა და აქვე დასძინა, რომ ჩერქეზულ კულტურის ცენტრში მათ გენოციდთან დაკავშირებული მასალები იქნება წარმოდგენილი.
ჩერქეზთა გენოციდისადმი მიძღვნილი მემორიალის და კულტურის ცენტრის დაარსების საკითხთან დაკავშირებით დღეს, ბიუროს სხდომაზე "რუსეთის იმპერიის მიერ ჩერქეზ ხალხის მიმართ გენოციდის მსხვერპლთა უკვდავყოფის შესახებ" დადგენილების პროექტის ინიცირება მოხდა.
პარლამენტი დადგენილების პროექტს 1-ელი ივლისის რიგგარეშე სხდომაზე დაამტკიცებს.
