ახალგაზრდა იურისტთა ასოციაციის თავმჯდომარის, თამარ ჩოგოშვილის განცხადებით, პარლამენტის წევრთა რაოდენობის რეფერენდუმის გარეშე გაზრდა არასწორი იქნება, რადგან, ასეთ შემთხვევაში, 2003 წელს ჩატარებული რეფერენდუმის შედეგების იგნორირება მოხდება.
„მართალია, პარლამენტის წევრთა რაოდენობის შეცვლა საკონსტიტუციო ცვლილებას საჭიროებს, რაც პარლამენტს შეუძლია, მაგრამ რეფერენდუმის გარეშე ამის ჩატარება ნიშნავს, რომ 2003 წელს ჩატარებული რეფერენდუმის შედეგების იგნორირება მოხდება, რაც, მიმაჩნია, რომ არასწორია", - განუცხადა ჩოგოშვილმა „ჯი-ეიჩ-ენს".
მისი განმარტებით, საია ხელისუფლების მიერ საარჩევნო გარემოს გაუმჯობესების საკითხზე ოპოზიციისთვის შეთავაზებულ წინადადებებს დეტალურად განიხილავს და მის სამართლებრივ შეფასებას აუცილებლად მოახდენს.
„ჩვენ ვაპირებთ შევისწავლოთ ეს ინიციატივები. გავიგოთ, რა მოაზრებოდა მათში. საჯაროდ გავრცელებული ინფორმაციის საფუძველზე, არ იკვეთება ის გარემოება, თუ რის ხარჯზე ხდება საკანონმდებლო ორგანოს წევრთა რაოდენობის გაზრდა და რა არის ამ ყველაფრის მიზანი და აზრი", - განმარტა ახალგაზრდა იურისტთა ასოციაციის თავმჯდომარემ.
შეგახსენებთ, რომ საარჩევნო გარემოს გაუმჯობესებასთან დაკავშირებით ხელისუფლების მიერ ოპოზიციისთვის შეთავაზებული წინადადებათა პაკეტი პარლამენტის წევრთა 190-მდე გაზრდას ითვალისწინებს, მაშინ, როცა 2003 წელს ჩატარებული რეფერენდუმის საფუძველზე განისაზღვრა, რომ დეპუტატთა რაოდენობა 150-ს არ უნდა აღემატებოდეს.
