რუსეთის პრეზიდენტმა დიმიტრი მედვედევმა ხელი მოაწერა კანონს ოქმის რატიფიკაციის შესახებ, რომელიც სომხეთში რუსული სამხედრო ბაზის შესახებ 1995 წელს ხელმოწერილი შეთანხმებისთვის ვადის გაგრძელებას ეხება. ინფორმაციას ამის შესახებ კრემლის ვებგვერდი ავრცელებს.
აღნიშნულ ოქმს ხელი ერევანში ჯერ კიდევ 2010 წლის აგვისტოში მოეწერა ხელი. შეთანხმების მოქმედების ვადა 25 წელი იყო, ოქმი კი მის მოქმედებას 49 წლამდე ზრდის (1995 წლიდან მოყოლებული). ამიერიდან შეთანხმების მოქმედება ავტომატურად გაგრძელდება ყოველ 5 წელიწადში, იმ შემთხვევაში, თუ მხარეთაგან ერთ-ერთი წერილობითი ფორმით, მორიგი 5 წლის ამოწურვიდან ექვსი თვით ადრე მეორე მხარეს არ შეატყობინებს, რომ შეთანხმების შეჩერება სურს.
სომხეთის ჩრდილოეთში, გიუმრში 1995 წლიდან დგას 102-ე რუსული სამხედრო ბაზა. იგი რუსეთის ფედერაციის ჩრდილო-კავკასიის სამხედრო ოლქის სარდლობას ემორჩილება. ბაზა აღჭურვილია "С-300" საზენიტო-სარაკეტო კომპლექსებითა და "მიგ 29" ტიპის გამანადგურებლებით. პირადი შემადგენლობის რაოდენობა დაახლოებით 5 ათას ადამიანს შეადგენს.
