„დემოკრატიული მოძრაობის" ლიდერის, ნინო ბურჯანაძის აზრით, ერთადერთი მიზანი, რასაც „რვიანმა" მიაღწია ისაა, რომ „ნაციონალურ მოძრაობას" ხელისუფლებაში ყოფნის ვადა გაუხანგრძლივა.
„რამდენად შეიძლება „რვიანს" ოპოზიციური გაერთიანება ეწოდოს, საზოგადოებამ განსაზღვროს. ერთადერთი, რასაც მან მიაღწია, ეს არის ხელისუფლებისთვის ხელისუფლებაში ყოფნის ვადის გახანგრძლივება. მომავალი არჩევნებიც ისე მოვა, რომ საარჩევნო გარემო უცვლელი დარჩება", - განუცხადა ბურჯანაძემ ჟურნალისტებს აღნიშნულ საკითხზე კომენტირებისას.
მისი შეფასებით, ხელისუფლების მიერ ოპოზიციური პარტიებისთვის შეთავაზებული წინადადებები „სამარცხვინოა".
„ხელისუფლების განცხადება და წინადადება ნიშნავს, რომ დაფინანსებას მიიღებენ მხოლოდ ის პარტიები, რომლებიც მის დაკრულზე იცეკვებენ. მადლობა ღმერთს, „რვიანის" შემადგენლობაში ჩემი პარტია არ არის", - აღნიშნა ბურჯანაძემ.
ბურჯანაძე „მემარჯვენეების" გადაწყვეტილების გამო გაკვირვებას გამოთქვამს და აცხადებს, რომ მისთვის გაუგებარია, რატომ ალაპარაკდნენ „ახლები" პარლამენტის წევრთა რაოდენობის გაზრდაზე ახლა, როცა მათი შემცირების მოთხოვნით ბურჯანაძის საკანონმდებლო ორგანოს თავმჯდომარეობის პერიოდში მის მისაღებთან შიმშილობდნენ.
„თუ „რვიანი" იმ მიზნით შეიქმნა, რომ საზოგადოება შეცდომაში შეეყვანა და ხელისუფლებისთვის ვადა გაეხანგრძლივებინა, მაშინ მან ამას წარმატებით მიაღწია. არც ერთი სერიოზული საარჩევნო საკითხი კი ხელისუფლებას არ გაუთვალსიწინებია", - აღნიშნა ბურჯანაძემ.
