დღეს, საქართველოს ოფიციალური ვიზიტით ამერიკელ კონგრესმენთა მორიგი დელეგაცია ეწვევა. ამის შესახებ დღეს გამართულ ტარადიციულ ბრიფინგზე საგარეო საქმეთა მინისტრის მოადგილე ნინო კალანდაძემ განაცხადა.
მისი თქმით, დელეგაცია ორდღიანი ვიზიტით ბათუმს ეწვევა და შეხვედრებს საქართველოს პრეზიდენტ მიხეილ სააკაშვილთან, პრემიერ-მინისტრ ნიკა გილაურთან და ეროვნული უშიშროების საბჭოს მდივან გიგა ბოკერიასთან გამართავს.
"შეხვედრების ფარგლებში, ამერიკელ კონგრესმენებს ინფორმაციას მივაწვდით ქვეყანაში მიმდინარე და უკვე განხორციელებული რეფორმების შესახებ. ასევე, საუბრის ერთ-ერთი მთავარი თემა უსაფრთხოების საკითხები იქნება, როგორც საქართველოში, ასევე მთელ რეგიონში", - აღნიშნა კალანდაძემ და აქვე დასძინა, რომ ამერიკელი კონგრესმენების დაინტერესება საქართველოს მიმართ ბოლო დროს კიდევ უფრო გაიზარდა.
მიმდინარე წელს ეს უკვე ამერიკელ კონგრესმენთა საქართველოში რიგით მეხუთე ვიზიტია.
ამერიკელ კონგრესმენების დელეგაციას რესპუბლიკელი კონგრესმენი დენი ბარტონი უხელმძღვანელებს.
