თბილისის მერი გიგი უგულავა თბილისში დასუფთავების გადასახადის ელექტროენერგიის გადასახადზე მიბმას "სოციალურად სამართლიანს" უწოდებს. მისი თქმით, სულადობის მიხედვით დასუფთავების გადასახადის გადახდა არასამართლიანია, რადგან მაღალი მიგრაციის გამო თბილისში ბევრი დაკეტილი ბინაა, რომელშიც არავინ ცხოვრობს და მოქალაქეების იქ ჩაწერის გამო მეპატრონეს გადასახადის გადახდა მაინც უწევს.
ქალაქის მერი აცხადებს, რომ საჭირო იყო, დასუფთავების გადასახადი რომელიმე მყარ კრიტერიუმს მიჰბმოდა და ყველაზე სამართლიანი მისი სწორედ მოხმარებული ელექტროენერგიის გადასახადზე მიბმაა.
"თბილისში დასუფთავების გადასახადის ელექტროენერგიის გადასახადზე მიბმა სოციალურად სამართლიანია იმიტომ, რომ ხშირად გვაქვს შვიდსულიანი ოჯახები, რომლებიც ცოტა ელექტროენერგიას მოიხმარენ, რადგან უჭირთ, მაგრამ დასუფთავების გადასახადი მაღალი ჰქონდათ. ელექტროენერგიის მოხმარება ოჯახის ერთგვარი მაჯისცემაა და ამის მიხედვით შეიძლება გამოვიტანოთ დასკვნა, როგორ ცხოვრობს ოჯახი. ამდენად, გადავწყვიტეთ, დასუფთავების გადასახადი ელექტროენერგიაზე მიგვება. თუ გამოვითვლით, გამოვა, რომ მოსახლეობის ნახევარზე მეტს ეს გადასახადი შეუმცირდება, ნაწილს შეიძლება, გაეზარდოს, მაგრამ ყველა თბილისელს აქვს შესაძლებლობა, მართოს ეს გადასახადი ელექტროენერგიის დაზოგვის გზით", - განაცხადა ქალაქის მერმა.
