მოსკოვისა და სრულიად რუსეთის პარტიარქი კირილი ოს სეპარატისტთა ლიდერს ედუარდ კოკოითს შეხვდა. ინფორმაციას ამის შესახებ ე.წ. სამხრეთ ოსეთის ბეჭდვისა და ინფორმაციის კომიტეტი ავრცელებს. მათი ინფორმაციით, მოსკოვისა და სრულიად რუსეთის პატრიარქი ოს სეპარატისტთა ლიდერს რუსეთის მართლმადიდებლური ეკლესიის ყოველმხრივ მხარდაჭერას დაჰპირდა.
"რუსეთის მართლმადიდებლური ეკლესია სამხრეთ ოსეთის ჰუმანიტარული დახმარებითაა დაკავებული. ამას ვაკეთებთ იმის გამო, რომ ვაცნობიერებთ, რა სიმწარე ხვდა წილად სამხრეთ ოსეთის მოსახლეობას", _ განაცხადა პატრიარქმა კირილმა შეხვედრაზე და დასძინა: "ვიზიარებთ მწუხარებას უდანაშაულოდ დახოცილი ადამიანების გამო. რუსეთის ეკლესიას სურს, თავისი წვლილი შეიტანოს სამხრეთ ოსეთის აღდგენის საკითხში, იმისთვის, რათა ეს რაც შეიძლება მალე მოხდეს მატერიალურადაც და რაც მთავარია მორალურადაც, იმისთვის, რათა ადამიანების მეხსიერებიდან წაიშალოს ის უმძიმესი დღეები", _ განაცხადა რუსეთის პატრიატქმა.
სეპარატისტთა ლიდერმა პატრიარქს მადლობა გადაუხადა და აღნიშნა, რომ "რუსეთის მართლმადიდებლური ეკლესია ერთ-ერთი პირველი მივიდა ოსი ხალხის დასახმარებლად უმძიმეს წუთებში".
