საპარლამენტო უმრავლესობის შეფასებით, თავდაცვის ექს-მინისტრის ექსტრადაციის საკითხი სამართალდამცველების გადასაწყვეტია. ამის შესახებ ჟურნალისტებს საპარლამენტო უმრავლესობის ერთ-ერთმა ლიდერმა აკაკი მინაშვილმა დეპუტატი გურამ ჩახვაძის ინიციატივის შეფასებისას განუცხადა.
მისი თქმით, სამართალდამცავებმა საზოგადოებას საფუძვლიანი ინფორმაცია მიაწოდეს, როგორ აპირებდა ოქრუაშვილი გარკვეულ ჯგუფთან ერთად სახელმწიფოს საფუძვლების შერყევას.
"მისი მცდელობა და მთავარი მიზანი სახელმწიფოს მოშლა იყო, მაგრამ მან ამ მიზანს ვერ მიაღწია, რადგან ქართული საზოგადოება ძალიან ერთსულოვანია. მას ეს არც ახლა და არც მომავალში არ გამოუვა, განსაკუთრებით იმ ფონზე, როცა სამართალდამცავებმა წლების განმავლობაში დიდი გამოცდილება შეიძინეს. რაც შეეხება ექსტრადიციას, ამაზე სამართალდამცავები მუშაობენ. ეს სხვა საკითხია", - აცხადებს მინაშვილი.
მისი თქმით, სასამართლოს მიერ უკვე გამოტანილი გადაწყვეტილების თანახმად, ირაკლი ოქრუაშვილი დაუსწრებლად უკვე გასამართლებულია.
შეგახსენებთ, რომ დღეს პარლამენტის რიგგარეშე სხდომაზე დეპუტატმა გურამ ჩახვაძემ ხელისუფლებას თავდაცვის ექს-მინისტრ ირაკლი ოქრუაშვილის საფრანგეთიდან ექსტრადაციის ინიციატივით მიმართა.
