კომპანია „ნატახტარის" თბილისის ლუდის ფესტივალი, რომელიც წელს უკვე მეორედ 25-26 ივნისს გაიმართება, შარშანდელისაგან განახლებული ფორმატითა და მონაწილეებით გამოირჩევა.
გერმანული და ზოგადად დასავლური გამოცდილების დანერგვის მიზნით, ფესტივალის ორგანიზებაში ჩაერთო მსგავსი ტიპის მასობრივი გასართობი ღონისძიებებისა და მასშტაბური პრომო აქციების ჩატარებაში გამოცდილი და დახელოვნებული პრომო პერსონალი. წელს პირველად ტრადიციულ ბავარიულ ფორმებში გამოწყობილი გოგონები გახსნიან თბილისის ლუდის ფესტივალს და მის სტუმრებს 2 დღის განმავლობაში მოემსახურებიან.
25 და 26 ივნისს, თბილისში, ვარდების რევოლუციის მოედანზე, უკვე მეორედ გაიმართება "თბილისის ლუდის ფესტივალი", რომელიც, გასული წლის მსგავსად 2 დღის განმავლობაში გაგრძელდება და გაცილებით უფრო მასშტაბური ღონისძიება იქნება. ამით, ევროპის სხვადასხვა ქვეყანაში გავრცელებული ლუდის ფესტივალების ქართული ანალოგი ტრადიციულ სახეს იღებს.
"ნატახტარის" ლუდის ფესტივალი, სადაც ყველა მსურველს უფასოდ შეუძლია მოხვედრა, უამრავი გასართობი და საინტერესო კომპონენტისგან შედგება. ვარდების რევოლუციის მოედანზე იქნება დამონტაჟებული სცენა, სადაც გაიმართება ცოცხალი კონცერტი ცნობილი ქართული ჯგუფების მონაწილეობით. საკონცერტო პროგრამაში მონაწილეობენ "მგზავრები", "ფრანი", "როდრიგესი", სალომე კორკოტაშვილი და 4 ცნობილი პაბის ბენდი.
"ნატახტარის ლუდის ფესტივალზე" ერთდროულად შეძენილ ყოველ 5 კათხა (1 კათხა ეღირება 1 ლარი) ლუდზე სტუმარი მიიღებს 1 ბილეთს და ექნება შანსი, მოიგოს 5 სხვადასხვა ტიპის საჩუქარი: ქუდი, უფასო ლუდის, სათვალე, კათხა და მაისური. მოეწყობა თამაშები და სხვა გასართობი ღონისძიებები. ტერიტორიაზე განთავსდება კვების 4 ობიექტი, რომელთა სამზარეულო განსხვავებული იქნება. ვარდების მოედანზე დაიდგმება ხის გრძელი მაგიდები და მთელს ტერიტორიაზე დაიდება თივის შეკვრები. დასავლური ლუდის ფესტივალების ანალოგიურად, აქაც გაიყიდება ღონისძიების ლოგოიანი სამახსოვრო სუვენირები და საჩუქრები. წელს ლუდის ფესტივალზე, "ნატახტარის ლიმონათის" ორგანიზებით მოეწყობა სპეციალური კუთხე ბავშვებისთვის.
ფესტივალის ორგანიზატორია კომპანია "ნატახტარი". ღონისძიების მენეჯმენტს ახორციელებს კომპანია "ბეთერფლაი". მხარდამჭერები არიან ქალაქ თბილისის მერია, კულტურისა და ძეგლთა დაცვის სამინისტრო და ტურიზმის ეროვნული სააგენტო. ფესტივალის საზოგადოებასთან ურთიერთობას უზრუნველყოფს კომპანია "ჯეპრა".
