დღეს აჭარის მთავრობის თავმჯდომარემ, ლევან ვარშალომიძემ და ქალაქის მერმა, რობერტ ჩხაიძემ ადლიაში საკანალიზაციო გამწმენდი ნაგებობის მშენებლობის პირველი ეტაპის დასრულება შეაფასეს.
სამუშაოებს აწარმოებენ ავსტრიული და თურქული კომპანიები: „შტრაბაგი" და „ჩელდიქ ოღლუ". პროექტი 15 მილიონ ევროიანია და მსოფლიო ბანკისა და გერმანული სახელმწიფო ბანკის KFW-ს ხელშეწყობით ფინანსდება.
მშენებლობის დასრულების შემდეგ, ბათუმისა და ხელვაჩაურის მუნიციპალიტეტის საკანალიზაციო სისტემები გამწმენდ ნაგებობას მიუერთდება. იქ ფეკალური მასები გადამუშავდება, რის შემდეგაც გაფილტრული და სუფთა წყალი მიწის ქვეშ 40 მეტრის სიღრმეზე ჩადებული მილით ნაპირიდან 1,5 კმ-ს მოშორებით ზღვაში ჩაიღვრება. ნარჩენ, მკვრივ მასას კი, სოფლის მეურნეობაში სასუქად გამოიყენებენ.
როგორც ლევან ვარშალომიძემ აღნიშნა: „ეს უმნიშვნელოვანესი პროექტია, რადგან ბათუმსა და გონიო-კვარიათში ჩამოსულ დამსვენებლებს შავი ზღვისპირეთში ერთ-ერთი უსუფთავესი სანაპირო ზოლი დახვდებათ. მშენებლები დაგვპირდნენ, რომ სამუშაოებს დათქმულ ვადებში შეასრულებენ. მიხარია, რომ ობიექტზე დასაქმებულთა ნახევარზე მეტი ადგილობრივი კადრია."
სამუშაოების მესამედი უკვე დასრულებულია და საფილტრი ნაგებობა ექსპლუატაციაში მომავალი წლის სექტემბერიდან შევა.
