აზიის განვითარების ბანკმა საქართველოს 300 მილიონი აშშ დოლარის მოცულობის საკრედიტო ხაზი დაუმტკიცა. თანხა მდგრადი ურბანული ტრანსპორტის საინვესტიციო პროგრამის ფარგლებში გამოიყო და ის დედაქალაქსა და საქართველოს სხვა დიდ ქალაქებში პრიორიტეტული სატრანსპორტო პროექტების განხორციელებას მოხმარდება.
რა სახის პროექტებზეა საუბარი, აღნიშნულის პრეზენტაცია სასტუმრო "რედისონში"გაიმართება, რომელსაც თბილისის მერი გიგი უგულავა დაესწრება და მოწვეულ სტუმრებს სიტყვით მიმართავს.
როგორც „ჯი-ეიჩ-ენს" დედაქალაქის მერიიდან აცნობეს, თბილისში პრიორიტეტული სატრანსპორტო პროექტების შერჩევა ქალაქის ტრანსპორტის განვითარების გეგმის თანახმად მიმდინარეობს, რომლის შემუშავებაც 2010-2011 წლებში აზიის განვითარების ბანკის გრანტით დაფინანსდა. გეგმის მიზანია ყველა ის ფაქტორი გამოავლინოს, რომელიც მნიშვნელოვნად აფერხებს ტრანსპორტის განვითარებას და შეიმუშაოს შესაბამისი სატრანსპორტო გადაწყვეტილებები.
თბილისის სატრანსპორტო გეგმის ფარგლებში დღემდე ოცდაათამდე სატრანსპორტო პროექტი შემუშავდა, რომელიც მიზნად ისახავს საგზაო ქსელისა და მოძრაობის მართვის გაუმჯობესებას, სატრანსპორტო ინფრასტრუქტურის განვითარებას და მოსახლეობისთვის გაუმჯობესებული სერვისების შეთავაზებას.
აზიის განვითარების ბანკსა და თბილისის მერიას შორის აქტიური კონსულტაციების შედეგად განისაზღვრა იმ პროექტების ნუსხაც, რომელიც ბანკის მიერ, ურბანული ტრანსპორტის საინვესტიციო პროგრამის ფარგლებში დაფინანსდება. ესენია: გორგასლის გვირაბი, მეტრო „უნივერსიტეტის" სადგურის დასრულება (ობიექტის მშენებლობა 2012 წელს განახლდება და პროექტის განხორციელება ორ წელიწადში დასრულდება), თბილისი-რუსთავის გზის მოდერნიზაცია და სამანქანო ხიდი მდინარე მტკვარზე, რომელიც ვეფხისა და მოყმის მიმდებარე ტერიტორიას დიდუბესთან დააკავშირებს.
