"ქრისტიან-დემოკრატებსა" და "ნაციონალური მოძრაობის" აქტივისტებს შორის "ბოგდან ხმელნიცის" ქუჩაზე დაპირისპირება მოხდა. როგორც "ჯი-ეიჩ-ენს" საკრებულოს "ქრისტიან-დემოკრატმა" დეპუტატმა ინგა გრიგოლიამ განუცხადა, ის მის ორ თანაგუნდელთან ერთად ბრიფინგს მართავდა, როდესაც "ნაციონალების" აქტივისტები მივარდნენ და მუქარით დაშლა მოსთხოვეს.
"დაახლოებით ერთი საათის წინ ნაციონალური მოძრაობის ზონდერ კამანდასთან მოგვივიდა დაპირისპირება. ბოგდან ხმლენიცკის ქუჩაზე საკრებულოს ფრაქცია "ქრისტიან-დემოკრატების" წევრები, მე, ზაზა გაბუნია და ჯაბა სამუშია ვმართავდით ბრიფინგს დასუფთავების მოსაკრებლის შეცვლის თაობაზე. ამ დროს მოვარდა ნაციონალური მოძრაობის აქტივისტთა ჯგუფი და დაახლოებით ისე იქცეოდნენ, როგორც იქცევიან ხოლმე ხალხის დაშლის დროს. ისინი ხალხისგან მოითხოვდნენ დაშლას. ჩვენ გვაქვს სურათები და ამ სურათებს ჟურნალისტებს გადმოვცემთ დღეს გასამართ პრესკონფერენციაზე. ამბობდნენ ასეთ ფრაზებს, რომ ეს უბანი არის ხვიჩა სანაიასი და უბანი და მისი სამეგობრო პატივს სცემს და დაიცავს ხვიჩა სანაიას. ხვიჩა სანაია არის მაჟორიტარი დეპუტატი საკრებულოში ისანი-სამგორის რაიონიდან. ხალხს ემუქრებოდნენ რომ დაშლილიყვნენ. ჩვენ გვაქვს კითხვა მიხეილ სააკაშვილთან და მის გუნდთან, რომლებიც გვიმტკიცებენ რომ ქურდული მენტალიტეტი ალაგმეს ქვეყანაში. თუკი აღარ არსებობენ ქურდები და არ არის ქურდული კანონები, რატომ გვიპირისპირდებიან მათი საძმოები და სამეგობროები. რატომ გვემუქრებიან ისეთი ფრაზებით, რომ დავიშალოთ თორემ, ხვიჩა სანაიას საძმო პასუხს გვაგებინებს", - განუცხადა "ჯი-ეიჩ-ენს" გრიგოლიამ.
მისი თქმით, ინციდენტი მას შემდეგ ამოიწურა, როდესაც დაუკავშირდნენ ხვიჩა სანაიას და მისი "დაჯგუფების" დაშლა მოსთხოვეს.
აღნიშნულ საკითხთან დაკავშირებით, დღეს 15:00 საათზე, საკრებულოს შესასვლელთან სპეციალურ ბრიფინგს გამართავენ. ბრიფინგზე "ქრისტიან-დემოკრატები" მმართველი პარტიიდან დღევანდელი ინციდენტის მონაწილეების ფოტოებს გამოაქვეყნებენ.
