აჭარის ტურისტული პოტენციალით სანკტ-პეტერბურგის მსხვილი ტურისტული სააგენტოები დაინტერესდნენ. ტურკომპანიების წარმომადგენლები ბათუმში ჩარტერული რეისით დღეს დილით ჩამოფრიდნენ. 12 ტურისტული კომპანიის წარმომადგენელი ბათუმში კომპანია "ალტერბერგის" ორგანიზებით ჩამოვიდა.
"ალტერბერგი" სანკტ-პეტერბურგში ერთ-ერთ წამყვან ტურისტულ კომპანიად მიიჩნევა. მისი ფილიალი ერთი თვის წინ ბათუმშიც გაიხსნა. კომპანია ზღვისპირა რეგიონში რუსი ტურისტების ჩამოყვანას უზრუნველყოფს.
"ტუროპერატორები ერთი კვირის განმავლობაში ადგილზე შეისწავლიან აჭარის ტურისტულ პოტენციალს, რათა შემდგომში თავიანთ კლიენტურას ტურების სახით ჩვენს რეგიონში დასვენება და მოგზაურობა შესთავაზონ. ბუნებრივია, მათი დაინტერესება შეიძლება გახდეს, ერთი მხრივ, საფუძველი ისეთი დიდი ტურისტული ბაზრის მოზიდვის, როგორიცაა რუსეთი, მეორე მხრივ კი, აჭარაში ტურიზმის განვითარების", - აცხადებენ აჭარის ტურიზმის დეპარტამენტში.
