ეთნოწმენდამომხდარი რეგიონებისთვის დამოუკიდებელი სახელმწიფო ფაშისტურ და კომუნისტურ რეჟიმებსაც კი არ უწოდებიათ", - ასე აფასებს საქართველოს ტერიტორიული მთლიანობის აღდგენის დროებითი საპარლამენტო კომისიის თავმჯდომარე, შოთა მალაშხია კავკასიის საკითხებში ექსპერტის, მამუკა არეშიძის ახალ ინიციატივას, საქართველოს მიერ აფხაზეთის დამოუკიდებლობის აღიარების შესახებ.

როგორც მალაშხია "ჯი-ეიჩ-ენთან" საუბარში აცხადებს, საქართველოს ეს ტერიტორიები ოკუპირებულია, ანუ ამ ტერიტორიებზე არის ჩადენილი დანაშაული, აქ მოხდა ეთნოწმენდა - დანაშაული კაცობრიობის წინაშე.

"ეთნოწმენდამომხდარ რეგიონს დამოუკიდებელი სახელმწიფო რომ დავარქვათ, ამგვარი რამ არც არც ფაშისტურ რეჟიმს გაუკეთებია და არც კომუნისტურს. ტერიტორიული მთლიანობის პრინციპი, შეიძლება დაირღვევს მაშინ, როდესაც ერთი ერი მეორე ერს გენოციდს უწყობს. მაგალითად, სერბეთის ტერიტორიული მთლიანობა დაირღვა იმიტომ, რომ საერთაშორისო სამართლის მიხედვით, სერბებმა კოსოვოში ალბანელებს ეთნოწმენდა და გენოციდი მოუწყვეს, ამიტომ მსოფლიო საზოგადოებამ დაარღვია ტერიტორიული მთლიანობის პრინციპი და კოსოვოს დამოუკიდებელი სახელმწიფოს სტატუსი მიანიჭა", - განმარტა მალაშხიამ.

დეპუტატის განმარტებით, არა მხოლოდ საქართველოს ხელისუფლების, არამედ საერთაშორისო ორგანიზაციების დასკვნებში, მათ შორის ეუთოს, გაეროს, ნატოს, ევროკავშირის, ცალკეული სახელმწიფოებისა და საერთაშორისო არასამთავრობო ორგანიზაციების რეზოლუციებში წერია, რომ ამ ოკუპირებულ ტერიტორიაზე, უპირატესად, ქართველების ეთნოწმენდა მოხდა.

"როდესაც რუსეთი საუბრობს აფხაზეთზე, როგორც დამოუკიდებელ სახელმწიფოზე, ეს ნიშნავს, რომ წახალისებულია ეთნოწმენდა, ანუ მათ ცნობიერებაში ეს არის ნორმა. რაც პუტინმა და მედვედევმა გააკეთეს, არც ჰიტლერს და მის მიმდევრებს გაუკეთებიათ, რომლებიც უკვე გასამართლებულები არიან, არც სტალინს და მის მიმდევრებს, რომელებიც ჯერ კიდევ გასასამართლებლები არიან", - განაცხადა "ჯი-ეიჩ-ენთან" საუბრისას მალაშხიამ.

საპარლამენეტო კომისიის თავმჯდომარის თქმით, ეს ისეთივე ინიციატივაა, როგორიც, მაგალითად, გერმანიაში მცხოვრებმა ხუთმა მილიონმა თურქმა ტერიტორიის რაღაც ნაწილში გერმანელების ეთნოწმენდა რომ მოაწყოს, თქვას, რომ ეს არის დამოუკიდებელი თურქული სახელმწიფო და ამის შემდეგ ვინმემ მოინდომოს მისი დამოუკიდებლობის ცნობა.

"ამაზე მსჯელობა არ შეიძლება. ოჯახში რომ შევარდეს ყაჩაღი, ქალები გააუპატიუროს, დახოცოს, კაცებს თავები დააჭრას, ამის შემდეგ კი ვინმე გამოვიდეს საკანონმდებლო ინიციატივით და თქვას, რომ ეს ადამიანი ციხეში შეიძლება ცუდ წრეში მოხვდეს და უფრო რომ არ გაფუჭდეს, იქნება რომელიმე კურორტზე დასასვენებლად გავუშვათო; რომ დაიწყოს მტკიცება - ყაჩაღი ამდენი ადამიანის მკვლელობით შეწუხდა, დაინახა სისხლი, შეიძლება ნერვები მოეშალა კიდეც, ან ვინმემ წინააღმდეგობა გაუწია და მეტი გარჯა მოუხდა, ამიტომ უნდა დავასვენოთო. ჩვენ ახლა ასეთ საკითხზე ვსაუბრობთ და რაც ერთ ოჯახზე ვთქვი, აფხაზეთში 100 000-მა ოჯახმა გადაიტანა", - აცხადებს "ჯი-ეიჩ-ენთან" საუბარში უმრავლესობის წევრი.
მალაშხიას თქმით, თუ ვინმეს აქვს წინადადებები იმასთან დაკავშირებით, თუ როგორ უნდა მოხდეს ეთნოწმენდის შედეგების ლიკვიდაცია, როგორ დაბრუნდნენ საკუთარ სახლებში დევნილები, როგორი უნდა იყოს არააღიარების პოლიტიკა და როგორ მოვითხოვოთ რუსეთისგან ჩადენილ დანაშაულზე კონტრიბუცია, ხელისუფლება და მმართველი ძალა მზადაა ითანამშრომლონ მათთან.