საქართველოსა და სომხეთის ეკლესიის მეთაურებმა ერთობლივი კომიუნიკე მიიღეს.
"ჩვენ, სომხეთისა და საქართველოს ეკლესიის მეთაურებმა 2011 წლის 11 ივნისს ქალაქ თბილისში ურთიერთგაგებისა და ქრისტიანულ სიყვარულში თანამშრომლობის შესახებ შეთანხმებას მივაღწიეთ და ვაცხადებთ შემდეგს: საქართველო და სომხეთი უძველესი კულტურისა და ისტორიის ქვეყნები არიან, სადაც მოციქულებმა ქრისტიანობა I საუკუნეში იქადაგეს. ჩვენს ერებს მრავალი ათასი წლის განმავლობაში გადარჩენისა და თვითმყოფადობის შენარჩუნებისთვის ბრძოლა უხდებოდათ და ჩვენ ხშირად ვიდექით ერთმანეთის გვერდით. კეთილმეზობლური და მეგობრული ურთიერთობები დღემდე გრძელდება. ამის დასტურია სრულიად სომხეთის კათოლიკოს-პატრიარქისა და მისი თანმხლები პირების ამჟამინდელი ვიზიტი საქართველოში", - ნათქვამია კომიუნიკეში.
მასში ასევე აღნიშნულია, რომ გარეგინ მეორის საქართველოში ვიზიტმა აჩვენა, თუ როგორ ვითარდება ჩვენს შორის ურთიერთობა და ის ახალ ეტაპზე გადადის.
"ჩვენი ურთიერთობები ახალ ეტაპზე გადადის, რაც საქართველოში სომხეთის სამოციქულო ეკლესიისა და სომხეთში საქართველოს სამოციქულო ავტოკეფალური მართლმადიდებლური ეკლესიის თანასწორი იურიდიული სტატუსის განსაზღვრას, ასევე პარიტეტულ საფუძვლებზე საქართველოში სომხური (გრიგორიანული) და სომხეთში ქართული (დიოფიზეტური) ეკლესიების გახსნის ხელშეწყობას გულისხმობს", - აღნიშნულია კომინიკეში.
ამასთან, ორი ქვეყნის სულიერი ლიდერების მიერ მიღებული ერთობლივი კომინიკე ორმხრივი ეკლესიათაშორისი კომისიის შექმნასაც ითვალისწინებს.
"ამასთან, ვთხოვთ საქართველოსა და სომხეთის ხელისუფლებებს, აღნიშნული კომიუნიკეს დროულ იმპლემენტაციას შეუწყონ ხელი," - ნათქვამია კომიუნიკეში.
