"არცერთი კანონი არ არის შეუცვლელი და უნივერსალური დროსა და სივრცეში", - სწორედ ამით ხსნის "ჯი-ეიჩ-ენთან" საუბარში მთავრობის საპარლამენტო მდივანი გია ხუროშვილი ახალ "საგადასახადო კოდექსში" მუდმივ ცვლილებებს.
"საქართველოს მთავრობა ბიზნესთან კონსულტაციებს აქტიურად აგრძელებს და შესაბამისად, ხდება ანალიზი იმ პრობლემატიკის, რომელიც განიხილება დავების საბჭოზე, სადაც ხშირად დავა მეწარმის სასარგებლოდ წყდება. არის ზოგიერთი შემთხვევა, როდესაც ჩვენ ვხვდებით, რომ საკანონმდებლო ცვლილებებს საჭიროებს ამა თუ იმ პრობლემის მოგვარება", - აღნიშნა ხუროშვილმა.
მისი თქმით, "საგადასახადო კოდექსში" მთავრობის მხრიდან ცვლილებების ინიცირებაც სწორედ ამ პრაქტიკის განზოგადების შედეგად ხდება.
"ხშირად ჩვენი ოპონენტები გვსაყვედურებენ, რომ არ შეიძლება ამდენი ცვლილების შეტანა. აღნიშნულთან დაკავშირებით ჩვენ გვაქვს მკაფიო პასუხი - არც ერთი კანონი არ არის შეუცვლელი და უნივერსალური დროსა და სივრცეში. ყველა კანონი უნდა მოერგოს კონკრეტულ მოცემულობას და შესაბამისი გადაწვეტილებები უნდა იყო ადეკვატური დროსა და სივრცეში, იმ რეალობის გათვალისწინებით, სადაც ჩვენ ვცხოვრობთ", - აცხადებს მთავრობის საპარლამენტო მდივანი.
ამასთან, ხუროშვილის თქმით, მთავრობას კონსულტაციები ჰქონდა საპარლამენტო უმრავლესობასთან, ასევე კონსულტაციები გრძელდება ბიზნესის წარმომადგენელთან და ის ცვლილებები, რაც "საგადასახადო კოდექსში" შედის, სწორედ ერთობლივად მიღებული გადაწვეტილებებიდან მომდინარეობს.
