ვაჭრობის მსოფლიო ორგანიზაციაში რუსეთის გაწევრიანების საკითხზე რუსეთ-საქართველოს შორის მიმდინარე მოლაპარაკების მორიგი რაუნდი ივნისის ბოლოს გაიმართება. ამის შესახებ ნიჟნი ნოვგოროდში, სადაც რუსეთ-ევროკავშირის სამიტი გაიმართა, ჟურნალისტებს მოლაპარაკებებზე რუსეთის დელეგაციის ხელმძღვანელმა მაქსიმ მედვედკოვმა განუცხადა.
„მოლაპარაკებები ივნისის ბოლოს განახლდება. დარწმუნებული ვარ, რუსეთ-საქართველოს შორის არსებული მოუგვარებელი საკითხები გადაწყდება", - აღნიშნა მან.
შეგახსენებთ, რომ რუსეთის ვმო-ში გაწევრიანების საკითხზე მხარეებს შორის მოლაპარაკებათა ორი რაუნდია გამართული. მესამე რაუნდის გამართვის სავარაუდო თარიღი აქამდე არ სახელდებოდა, რადგან, როგორც გაცხადდა, გარკვეული ტექნიკური საკითხების შესათანხმებლად რამდენიმე კვირა შუამავალმა - შვეიცარიის მხარემ ითხოვა.
