ოსი სეპარატისტები ევროპარლამენტის მიერ საქართველოს ოკუპირებული ტერიტორიების - აფხაზეთისა და ე.წ. სამხრეთ ოსეთის შესახებ მიღებული რეზოლუციით უკმაყოფილონი არიან. "აბსოლუტურად უსარგებლო დეკლარაცია, რომელიც არავის მიერ არ იქნება გაგონილი და საერთოდ გაუგებარია რატომ გაჩნდა ის", - აცხადებენ სეპარატისტები.
ისინი ასევე აცხადებენ, რომ აღნიშნული რეზოლუცია არსებული რეალობების შეგნებული იგნორირებაა. ე.წ. სამხრეთ ოსეთის მარიონეტული პარლამენტის ე.წ. ვიცე-სპიკერი იური ძიცოითი აცხადებს, რომ უკვე დროა ევროპამ იცოდეს, რომ "აფხაზეთი და სამხრეთ ოსეთი ეს აღიარებული სახელმწიფოებია, ხოლო რუსეთის ჯარი საქართველოს ტერიტორიაზე არც მდგარა და არც დგას". ძიცოითი კვლავ იმეორებს, რო რუსი ოკუპანტები ცხინვალის რეგიონში "საერთაშორისო ნორმების შესაბამისად დგანან".
სეპარატისტები ასევე აცხადებენ, რომ მათ ეჭვი არ ეპარებათ იმაში, რომ არასწორი ფორმულირებები რეზოლუციაში საქართველოს ძალისხმევით მოხვდა.
"თბილისი მსხვერპლის როლს თამაშობს, ევროპელ დეპუტატებს, რომ სხვა ინფორმაცია არ აქვთ, გარდა იმ დეზინფორმაციისა, რომელსაც მათ საქართველო აწვდის", _ აცხადებს ძიცოითი.
შეგახსენებთ, რომ ევროპარლამენტი მიერ მიღებულ რეზოლუციაში მოუწოდებს რუსეთს შეწყვიტოს საქართველოს ოკუპირებულ ტერიტორიებზე - სამხრეთ ოსეთსა და აფხაზეთში პასპორტების გაცემა და პატივი სცეს გაფორმებულ შეთანხმებას. რეზოლუციაში ასევე არის მოწოდება რუსეთისადმი გაიყვანოს ჯარები საქართველოს ოკუპირებული ორივე რეგიონიდან.
