„სახალხო კრების" აღმასრულებელი საბჭო კრების ჩუღურეთის რაიონული ორგანიზაციის თავმჯდომარის მოადგილე ზაზა ჩიკვილაძის დაკავებას „მორიგ სამარცხვინო ქმედებას" უწოდებს და აცხადებს, რომ საქართველოში ტერორი და უკანონო დაპატიმრებები გრძელდება.
„სამართალდამცავებმა ჩუღურეთის რაიონული ორგანიზაციის თავმჯდომარის მოადგილე ზაზა ჩიკვილაძე 7 ივნისს ჯერ ავტობუსიდან ჩამოსვეს, შემდეგ მთელ დღეს უმისამართოდ ატარეს და პოლიციისთვის წინააღმდეგობის გაწევის მოგონილი ბრალდებით მხოლოდ საღამოს გადაიყვანეს ქალაქის სამმართველოში. ჩიკვილაძის ჯანმრთელობის მდგომარეობა უკიდურესად მძიმეა. მას აქვს მძიმე ფორმის დიაბეტი , რომელიც მუდმივ მკურნალობას საჭიროებს, გადატანილი აქვს მიოკარდიუმის ინფარქტი, დაავადებულია ლეიკემიით, რომელსაც ინტენსიური, სპეციფიკური მკურნალობა სჭირდება", - ნათქვამია კრების აღმასრულებელი საბჭოს განცხადებაში.
განცხადებაში აღნიშნულია, რომ „სახალხო კრების" აღმასრულებელი საბჭო პროტესტს გამოთქვამს იმ ტერორის გამო, რომელსაც ხელისუფლება ახორციელებს კრების წევრების მიმართ და მოუწოდებს სამართალდამცავ ორგანოებს, დაუყოვნებლივ შეწყვიტონ მშვიდობიანი და უდანაშაულო მოქალაქეების დევნა და გაათავისუფლონ პოლიტიკური ნიშნით დაკავებული ადამიანები, რომელთა რიცხვი უკვე რამდენიმე ასეულს შეადგენს.
„სახალხო კრება" მოუწოდებს უფლებადამცველ ორგანიზაციებს და საერთაშორისო მისიებს, სასწრაფოდ მოახდინონ ქმედითი რეაგირება საქართველოში მიმდინარე პოლიტიკურ ტერორზე და ადეკვატური შეფასება მისცენ ხელისუფლების ქმედებებს.
